滬綜指在三千點邊整固，慢慢嚟唔使急，反而係好事，畢竟要基本因素跟得上，升市才來得踏實，否則好似舊年咁，瘋上癲落，大部分參與者都成輸家，輸錢仲要輸埋鬥志，何苦呢！

A股精要

昨日港股都係反覆偏軟，反正恒指企穩在20,500點樓上，季結仍然有望上衝21,000點關。個股方面，蘋果公司宣布新產品，惟未見相關概念股有太突出的表現，瑞聲科技（02018）、富智康（02038）及高偉電子（01415）均低收作結。

短炒金風有胡要食

講到高偉，舊年以板塊中的新星、估值「便宜」為賣點吸引基金上車，股價由唔到4元炒上高位見8.85元，可惜升浪唔夠三個月，之後反覆回落，最低去到2元邊，唔少大戶小戶都要損手離場！雖然最近其股價成功重上3元樓上，但睇怕好難再說服班芬佬跟進，真係睇好產業表現，仲係從龍頭股入手較可取。

此外，昨日見風電股有異動，其中金風科技（02208）急升7%，收報10.92元。不過，綜觀最近投行對風電產業的預測較去年差，皆因預期在產能上升、但需求增長不明之下，供應商的毛利率會有壓力，且去年發改委重啟關於削減補貼的討論，亦為行業發展添上不明朗因素。

不過，在風電股之中，金風仍然是實力之選，上月發出的盈喜已經預告去年純利按年增長55%，公司將於下周二宣布業績，此前股價先行起動，惟12元關阻力非輕，要提防股價在業績公布之後「見光死」，短炒有利潤就要識得及時收割！

早前提及的石藥集團（01093）急升9%，收報6.91元，主要是公司公布去年度業績，純利按年增長31%至16.7億元，末期息每股11仙。睇好醫藥股前景，石藥無論產品組合、經營往績和盈利能力、以及控股股東背景，都係實力之選。