Fundman睇市：國壽估值可上調

事實上，唔單只新興市場難搞，最近歐洲再推全方位寬鬆政策，美國聯儲局都要放慢加息步伐，美匯指數近日一度落過94.58，資金有機會再次流出美元尋找「食快餐」機會，令人憧憬眼前股市可能醞釀新升浪。

憧憬資金流向短期逆轉的說法，並非無中生有，皆因除咗美元轉弱之外，金價持續做好、歐元上升、日圓亦曾見一四年十月以來高位，呢啲現象同一時間出現，顯然並非偶然。

券商股重現生機

再睇內地，兩會期間領導人同財金高官都異口同聲話要全力穩經濟，包括繼續採取寬鬆的貨幣政策及積極的財政政策，呢顆「定心丸」投資者自當欣然受落。再睇導致一月跌市的人民幣匯價，未再出現大幅波動，反而在美元轉弱之下，人民幣匯價連同油價一同彈升，難怪股市亦好似春回大地，生機重現咁款。

昨日滬綜指重上3,000點樓上，見一月中以來高位，與早前反彈浪唔同，呢兩日A股反彈成交明顯回升，尤其係昨日確實見到有資金落場追入券商股。誘因係內地證金公司下調拆借予券商作為兩融業務的轉融資費率，再加上人行行長周小川話希望有更大比例的儲蓄進入股市，即係講到明要撐A股，炒家一於順水推舟，結果唔少A股券商股都漲停板。

雖然恒指僅升12點收場，報20,684點，但成交都有801億元。國指試叩9,000關未果，收報8,928點，升45點。雖然從美元轉弱、商品價格及商品貨幣都有一定程度反彈，但任何缺乏實體經濟需求增長這基本面支持的反彈浪，都只能抱着有限注碼玩波幅的心態參與。

提及內地券商股，最近先後有投行就此板塊發表研究報告，其中大摩就話，內地股市槓桿回升，將支持券商股短期升勢。要知道，兩融業務乃券商股收益的命脈，亦係主宰內地股本市場興旺的其中一個重要指標。若然監管當局逐步放鬆券商兩融業務，A股市場氣氛有望持續回暖，但吓吓期望再現舊年四月的大時代就有點不切實際，改變心態，慢火煎魚可能仲襟玩。

港股中互聯互通頭號港資受惠股當然是港交所（00388），昨股價飆高9.8元，收報185.4元。雖然該股沽空量較上周五翻一番至194萬股，但以沽空比率來看僅10%，乃二月十八日以來最低，又唔使太驚係大戶借勢推高開淡倉升勢曇花一現，照計點都頂到做埋個基金季結。

除咗中資券商股同港交所直接受惠兩地股市氣氛好轉，其實內險股亦可一定程度受惠，皆因股市做好的話，理論上內險股的投資收益亦水漲船高，只是相對上影響較為間接，較遲起動亦不足奇，但走勢基本上相同。

保費增長勢頭佳

中國人壽（02628）將於明日公布去年度業績，一月公司曾發盈喜，預計純利按年增幅5至10%，其中一個原因正係投資收益增加。再看國壽今年首兩個月的保費收入為1,587億元人仔，較去年同期增長38%，保費收入增長勢頭唔錯，若然次季魚缸回暖，目前估值確有上調空間。

睇走勢，年初以來國壽股價隨市況尋底，二月初一度低見16元，而反彈就一直受制於18.5元水平。直至近日走勢成功突破，昨高位19.5元，收報19.28元，10日線一旦升穿50日線，可進一步確認短線利好，且看假前的業績消息，能否為股價闖關送上東風。