中國財政部長話，唔關心評級公司評級，講得都幾瀟灑，但依家內地金融市場話要吸引外資入局，搞互聯互通、爭取A股入MSCI指數等，偏偏外資十分重視市場信貸評級，堂堂一國財金高官，如此答覆顯得有欠專業！

A股精要

不過，中國做事作風向來有自已一套唔使理外邊眼光，人造A股瘋牛如是、暴力救市亦如是，反正最緊要符合「國情」。兩會之後，A股一直反覆向好，滬綜指昨日重上3,000點關，滬股通上周四、五分別錄得20億元及13億元人民幣資金流入，但昨日只係得8,000多萬元人民幣資金流入，尚未可確認資金流持續性。到底阿爺係咪又靜雞雞應約「慢牛」盛宴，仍須要更多數據支持才可下判語。

券商股初現起色

不過，昨日券商股異動，確實係成大半年未見過。事緣中證金公司自今日起恢復轉融資業務五個期限品，並下調專融資費率，算係救市之後有關部門首次「鬆手」，令市場揣測中央認為市場槓桿進入合理區間，將逐步放手讓資金流入股市，讓股市更好地服務實體經濟，結合上周領導人明確話深港通今年內會推出，以及人行行長品評A股的言論，難怪港交所（00388）一彈就半成，收報185.4元。

本欄上周推介的中金（03908）表現靚仔，可以繼續坐順風車。券商股有大食大當選中信證券（06030）及海通證券（06837），昨日升幅均逾半成。另外，筆者亦留意咗隻較生面口的華泰證券（06886），股價成功突破近十個月的阻力位16元，昨日高位見17.7元，收報17.56元，升10.44%。若板塊氣氛短期持續升溫，睇勢呢隻股有機會挑戰去年十一月高位20.9元。

華泰在去年六月上市，好唔好彩上市不久遇上A股崩盤，當時招股價24.8元，股價在去年八月最低見過11.8元，即係較招股價唔見一半有多。昨日大摩亦發表報告，話未來六十日內華泰股價可以跑贏大市。上市咁耐都未曾大炒過，睇大行口風，不排除大戶們已上足子彈，順勢小注一試亦無妨。