樓價跌唔停，唔少屋苑樓價已經時光倒流，令二手市場近期爆蝕讓潮，近期可謂單單見紅，好似紅磡昇御門有個低層單位，減咗120萬元後，以780萬元賣出，連使費估計蝕近百萬元；而灣仔尚翹峰有辣招盤賣750萬元，連埋辣招稅亦係要蝕超過百萬元。

樓價跌勢未止，近期二手市場爆蝕讓潮。（資料圖片）

紅磡昇御門

近期二手帳面蝕讓個案

利嘉閣陳維進同劉Sir講，昇御門2座低層F室，實用面積606方呎，減咗120萬元先賣得出，成交價780萬元，實用呎價12,871元，約四年帳面蝕52.6萬元，估計連埋使費蝕近百萬元。

名鑄海逸平賣離場

市場爆料，尚翹峰3座中層戶賣750萬元，兩年帳面蝕30萬元，計埋辣招稅都蝕過百萬元。世紀21日昇稱，北角曉峯高層B室減95萬元後，有買家以900萬元購入，單位逾四年帳面蝕52.9萬元。

豪宅都有蝕讓，消息話，大埔康樂園東街有洋房賣咗2,168萬元，原業主揸咗幾年，帳面蝕至少20萬元；而北角半山寶馬山花園9座中層「97貨」，賣967萬元，揸咗十九年，業主帳面蝕約13萬元。美聯指出，尖沙咀名鑄中層G室賣2,650萬元，六年半帳面蝕30萬元。

近期成交好似多咗，但樓價就仍未止瀉。利嘉閣話，紅磡海逸豪園7座中層H室，只係賣咗610.8萬元，去番一二年個價，實用呎價1.13萬元；而將軍澳領都2座北翼中層銀主盤減咗105萬元，以660萬元賣出，實用呎價約8,029元。

新界樓都要減逾百萬元。美聯講，青衣美景花園10座低層A室劈價110萬元，以320萬元賣出，創屋苑一年半新低，實用呎價7,407元。

藍籌屋苑成交續旺

藍籌屋苑今個月承接力唔錯，鰂魚涌太古城最近連錄3宗買賣，中原話，屋苑雅蓮閣中層E室，同類單位曾經賣過1,600萬元，今次減152萬元，以1,318萬元賣出。另東涌映灣園兩日3單成交，屋苑6座高層兩房戶賣475萬元。至於西九四小龍加埋今個月有32宗買賣。

租市方面，中原話，上個月百大私人屋苑平均實用呎租30.4元，比一月跌2.9%，連跌五個月共10.6%。

美聯講，荔枝角曼克頓山5座複式單位租咗16萬元，實用呎租76.3元。