今個月樓市小陽春乍現,連藍籌屋苑也隨業主減價破悶局,交投從谷底反彈。若然鍾情市區藍籌盤,大可瞄準荔枝角老牌屋苑美孚新邨,現時不乏樓價跌穿五球的入門盤,較去年高位跌價逾一成,實用至上買家不妨「揀呢啲」。

美孚新邨鄰近的「嶺南之風」,採傳統中式庭園設計,古色古香。

二期內設港鐵出入口,盡享交通優勢。

屋苑有大型巴士總站。

二期住戶行兩步就到街市。

美孚新邨各期位置圖

美孚新邨是本港老牌藍籌屋苑,即使最遲落成的期數,樓齡亦逾四十年,但勝在佔地廣闊,合共有八期之多,規模冠絕全港私樓,有如置身自給自足的小社區,加上坐擁兩鐵交匯優勢,四圍去方便快捷,衣食住行不用愁。

間隔實用 業主有價講

屋苑另一賣點是單位開則實用,廳房比新進屋苑闊落得多,迎合實用至上人士需要。更重要是屋苑樓價低水,比附近一帶新進屋苑平一截,難怪長期有Fans捧場。

區內代理表示,新春過後部分屋苑業主擴議價空間,吸引買家入市,令本月買賣增至逾10宗,市況較上月明顯好轉,有個別一房業主更狠劈至400萬元超低價甩貨。

不過,他續說,這類超平價盤通常只得「一間半間」,執平貨機會一閃即逝,現時入場費已回升,但五球內上車盤仍不乏選擇,最平475萬元起錶,比起去年高位動輒五球叫價仍平一截,大膽還價或有意外驚喜。

這類五球以內平價盤,主要分布樓齡較舊的二至四期,雖然吸客度未必及得上人流最旺、兼且鄰近西鐵及港鐵荃灣線交匯處的五至七期,可幸有荔枝角公園「王牌」景區「嶺南之風」相伴,Budget有限的上車客一樣可享受悠閒生活。