樓價倒退搞到唔少業主「損手」，特別係奧運站浪澄灣同將軍澳天晉這類半新樓，最近幾乎有成交即見血。好似浪澄灣有高層單位以830萬元成交，比起一二年嘅購入價平咗超過50萬元，即係樓價跌穿埋一二年水平；而天晉就再錄明賺實蝕，有單位以653.8萬元賣出，雖然喺一四年至今升值咗近30萬元，但係扣番一成額外印花稅（SSD），帳面就已經損手接近40萬元。

樓價回落，二手市頻錄蝕讓成交個案。（資料圖片）

奧運站浪澄灣本月暫錄三宗成交。（資料圖片）

近日市場「出血」沽貨個案

日前政府都話，香港私人住宅樓價自去年九月高位至上月已累跌11%。代理老友同劉Sir講，浪澄灣今個月3宗成交非和即輸，最近錄得嘅8座高層A室，實用面積562方呎，以約830萬元賣出咗，實用呎價約莫14,769元。

佢話，原業主喺一二年中一手買入，淨計帳面已經輸咗超過50萬元，如果計埋釐印費同佣金等開支，分分鐘輸近一球。

至於天晉項目就再現明賺實蝕個案，代理爆料，天晉1座低層D室，實用面積533方呎，累減超過44萬元，以653.8萬元賣咗，實用呎價12,266元。

名鑄連使費蝕逾百萬

業主喺一四年中一手購入單位，雖然帳面賺咗接近30萬元，扣番逾65萬元嘅SSD稅款，已經損手近40萬元

此外，尖沙咀名鑄再錄做價跌破○九年嘅成交，屋苑中層G室售約2,650萬元，實用呎價約2.57萬元，較○九年購入價帳面蝕咗幾十萬元，連同釐印及佣金等，估計損手百幾萬元。

德福實呎8534元易手

九龍灣德福花園錄得一四年中以來首宗實用呎價跌穿九千元個案，中原陳鳳霞話，屋苑E座極低層4室售460萬元，實用呎價僅約8,534元。

佢仲話，九龍灣淘大花園O座中層8室以320萬元賣咗。比起舊年六月同座低層同室單位登記成交價404萬元，跌價足足超過84萬元。

美聯馮智堯話，將軍澳蔚藍灣畔2座中層B室，成交價約860萬元，比起同類單位做價高位回落咗大約100萬元。