恒指回吐146點，港股會否轉勢未知，但國際油價開始腳軟，紐約期油亞洲時段再跌逾2%報36.3美元，由一個月前從26美元起步的完美上升軌終於跌破。美股與油價一向如影隨形，隔晚道指竟然仲頂得住，但周二晚會面對較大壓力，美股與油價暫時難以「脫鈎」，而今晚聯儲局開完會兼有記者會，美股難免會有大幅波動，記住繫好安全帶。

主營手提電腦外殼業務的巨騰，業績出奇理想。（資料圖片）

太陽日誌 16/3/2016

其實美國原油庫存一路仍創歷史新高，加上凍產未有實質進展，油價升勢主要由補倉冚倉盤推動，一到40美金相信大把投資者等住重新沽貨，依家上到39美元有沽壓亦屬正路。恒指未能一鼓作氣再試高位，散戶傾向等埋議息結果，成交縮回565億元。

業績股舜宇跑出

滬綜指有理冇理又尾市反敗為勝，又係靠銀行股護盤，冇嘢好講！人大今日就閉幕，原本寄予很大期望的去庫存和去產能冇乜實質政策出台，但去庫存可能礙於近期大城市樓價升勢而無謂再撥火；總之，今次「兩會」期間股市表現維穩味道更重，特別之處是油價升、人民幣升、樓價升，全部都係反地心吸力，至於經濟數據差已不甚敏感，但地心吸力遲早發揮作用。

一批中型股近日先後公布業績，包括舜宇光學（02382）、信義玻璃（00868）、信義光能（00968）、特步國際（01368）及阜豐集團（00546）等，只得舜宇一隻升，且升到幾乎再創新高咁誇張，信能及阜豐則跌7%，碧桂園（02007）更大幅回吐9%之多。無論業績好醜，大部分公司派成績表之日亦係走鬼之時，尤其信能以及碧桂園已累積頗大升幅，更添回吐壓力。

不過，點解舜宇會顯得一支獨秀呢？手機鏡頭及車載鏡頭銷量好係人都知，關鍵可能在毛利率，集團全年毛利率16.5%，按年升1.2個百分點，亦高於上半年的15.5%，而主要產品光學零件業務毛利率亦升至35.1%（一四年26.7%，一五上半年32.5%）。

毛利率對手機設備股相當重要，手機品牌商價格競爭愈趨激烈，所以同時向設備供應商壓價；設備供應商不斷推出新產品和高端產品，但能保住毛利率不跌已算萬幸，瑞聲科技（02018）每季業績最影響股價的亦是毛利率升跌。

iPhone和三星均標榜旗艦手機的攝影功能是「大師級」，其他手機品牌亦要「落本」提升鏡頭各項功能，所以舜宇在手機設備股當中享有特別優勢。在業績後，麥格理將該股目標價由28元升至32元，現價距目標價仍有65%的上升空間！之但係，舜宇一五年PE接近23倍，可媲美龍頭科技股及醫藥股。姑勿論如何，舜宇股價剛突破19元附近之4頂阻力，大行近期相信將陸續大送高帽，走勢應有餘未盡。

信能可趁機買貨

舜宇盈利升34%，但業績前未有發盈喜，所以給予股東一個驚喜。信義光能早發盈喜，何故會見光死？信能今個月股價由2.2元低位反彈上2.8元，有回吐亦不稀奇，管理層對今年前景仍表樂觀，光伏玻璃價格今年首季上升一成，天然氣成本比去年下降，另發電站陸續提供盈利貢獻，待其回落可吼。

阜豐由去年五月高位累跌超過一半，去年上半年賺4.14億元人民幣，但下半年僅賺1億元人民幣。其實又不算大失所望，過去幾年業績急升，皆因黃原膠可用於生產頁岩氣而需求激增，去年油氣價格疲弱，黃原膠價格亦急跌；單睇下半年盈利，股價亦恐怕未見底。

若論上、下半年的反差，巨騰國際（03336）則是另一個對比，上半年賺3.54億元，下半年賺5.2億元。公司主要產品係手提電腦外殼，屬於走下坡行業，故此有爆冷味道。據分析，金屬外殼提高毛利率、二合一（手提+平板）電腦訂單及人民幣貶值成三大利好因素，一五年PE得4.4倍，去年中期業績後由終極低位累升六成多，今次會否再創奇迹？因具值博率，定好止蝕位小注冷敲無妨。