二線屋苑交投反彈力遠勝藍籌屋苑，部分上車二線屋苑及地區上半個月交投，已超過二月全月，樓市見「真．小陽春」；好似馬灣珀麗灣今個月錄10宗買賣，比上個月全月多1.5倍；青衣青怡花園本月至今有9宗買賣，比上個月更多2倍，而將軍澳及東涌等傳統住宅區，今個月交投亦超過上月全月。

二線屋苑買賣轉旺，其中馬灣珀麗灣月內已錄10宗成交。（資料圖片）

二線屋苑交投急升

美聯熊建明同劉Sir講，珀麗灣二月全個月只有4宗買賣，今個月已經有10宗，當中唔少係低價，好似15座低層A室，實用面積523方呎，減咗40萬賣420萬元，實用呎價8,031元，係一四年初個價位。

荃中普遍三球有找

利嘉閣彭錦添話，今個月青衣成區加埋有30宗買賣，比二月全月多5宗，青怡花園佔9宗，比上月全月多6宗，再有4座低層單位，賣咗355萬元。

該行鮑允中都話，九龍灣淘大花園今個月都有11宗買賣，比二月全月多3宗。美聯梁仲維講，荃灣中心二月只有8宗買賣，今個月頭半個月已經有9宗，有6宗成交「3球」有找。

傳統住宅區交投升得更明顯。美聯鄧國偉話，將軍澳全區二手買賣有89宗，比二月全月多6宗。世紀21將軍澳稱，同區東港城樓價跌穿五百萬元，屋苑3座中層B室只賣482萬元，實用呎價1.03萬元。世紀21奇豐話，馬鞍山全區都有43宗二手買賣，追平二月全月。

利嘉閣都講，東涌區今個月有21宗買賣，比二月成個月多4宗，映灣園錄至少7宗。消息指，屋苑6座高層G室只賣540萬元，實用呎價7,327元，係前年中價位。美聯講，同區東堤灣畔9座高層B室，減65萬賣665萬元，創一年同類新低。

上半年料跌價15%

睇番十大屋苑，除左天水圍嘉湖山莊有30宗買賣，位於傳統住宅區的將軍澳新都城及東涌映灣園，買賣超過上個月全月水平外，如荔枝角美孚新邨暫只有11宗，比上月全月少3宗，至於上車盤沙田第一城今個月有9宗，比上月全月少2宗。

戴德梁行香港區高級董事總經理陶汝鴻話，樓市跌勢仍在，估計到六月份中小型樓價跌10%，連埋首季上半年共跌15%。雖然預計中小型樓價約三個月下跌10%，唔認為係急跌，因為二○○八年金融海嘯一季樓價就下調20%情況，目前情況只係維持過去數個月的跌勢。