為娶「白富美」（皮膚白皙、家境富裕、相貌出眾）老婆，可以去到幾盡？80後任職理財顧問的張天天，下月將與白富美未婚妻結婚，面對未來岳母贈豪宅予女兒做嫁妝，加上要保持未婚妻的生活質素，他坦言，「試過工作無停手，日日只瞓三、四粒鐘，壓力爆燈！」幸而，適逢樓市回調，他年初上車築愛巢，終可在相識周年紀念日抱得美人歸。

理財顧問張天天表示，年初終覓得荃灣愉景新城心水盤，簽臨約時心情興奮。

張天天小檔案

現職美國萬通財務策劃高級經理的張天天，自小與家人分隔中港兩地，三年前銳意來港發展。他說：「細個喺福建長大，其後喺天津讀大學，畢業後喺天津做過銀行櫃枱服務員同埋大公司市場推廣工作，雖然呢啲工作喺朋友眼中好吃香，但自覺作為唔大，而且覺得香港嘅發展平台比內地大，又想同家人團聚，所以當時就同拍拖五年嘅女友分手，嚟香港大展拳腳。」

甫來港，他便任職理財顧問至今，雖然出身金融系，惟初時不愔廣東話，又感人生路不熟，令他難以適應，缺乏歸屬感。他說：「好彩當時同事同我上速成班，幫我惡補廣東話，亦好彩得到上司同朋友幫手，事業先上軌道，現時我專做內地客，月入約7萬，對比其他大學同學，我真係搵多好多；以香港朋友圈子嚟講，我係第一個置業。」可見天天對來港決定無怨無悔。

搵樓半年 五百多萬入市

天天去年認識曾任車模的未婚妻，更成為他賺錢的原動力。他透露，女友現居於深圳，家境富裕，而自己則出身於小康之家，雖然未來岳父、岳母並無要求他努力賺錢，更指只要兩人生活愉快，已別無他求，更將一所位於深圳福田區700萬元人民幣的單位轉歸女兒名下，另計劃提供首期，讓他們再於福田置業，惟他直言，為保持未婚妻婚後生活質素，所以終日過「爆肝」的生活，也萌生在港置業的念頭。

他去年八月起已睇樓，目標為荃灣愉景新城實用面積約600方呎單位，主因鄰近父母居所，且屋苑內有中港巴士，方便到深圳探望未婚妻，惟當時正值樓市高峰，同類低層單位叫價動輒近640萬元，使他頗為頭痛。及後樓市回調，他便於今年一月再睇樓，「只睇咗兩至三個單位，就決定買入愉景新城600呎、三房兩廳兩廁嘅中層山景單位，當晚只係睇樓十五分鐘就即時扑錘，業主原出價580萬元，經過討價還價，最終以五百多萬元上車，簽臨時約嗰陣我真係好興奮、好激動！」

專攻股票 幾年儲百萬

理財顧問收入並不穩定，銀行在審批樓按時，將天天的收入打七折至不足5萬元，終敍造六成按揭，需付約225萬元首期，每月供款1.5萬元，另擲60萬元「豪裝」。正所謂：「有媽的孩子像個寶。」父母身體力行支持他成家立室，故斥資逾百萬元付一半首期，希望紓緩愛兒的供款壓力，另主動資助一半裝修費。

在數年內儲過百萬元銀彈實非易事，他自言，個人投資策略相當進取及高風險，主要靠投資股票獲利，「淨係一味慳係冇用，進攻係最好嘅防守，喺舊年大時代，靠兩隻A股賺得最多，第一隻係石峴紙業（600462.SH），另一隻係宋都股份（600077.SH），亦沽貨獲利。」現將收入四成交予父母儲起，而月供股票基金、股票投資、個人使費則各佔兩成。

雖然新居尚未入伙，他已計劃再購一單位予家人居住或作出租之用。他坦言：「買物業可以抗通脹，我堅信買物業一定唔會輸！樓市約十年係一個周期，抗跌力較股市強，又唔使好似股票同基金咁成日睇住，我預計樓市會再跌一至兩成，一旦跌一成半就會再出手！」