Fundman睇市：電力股受捧有理由

毫無疑問，今日中國經濟確實係十個茶壺七個蓋，醫得頭嚟腳又痛，一四年底開始行寬鬆策略，放水救市配合經濟轉型，去產能、去庫存，結果，過去一年深圳樓價狂升近五成，逐漸見到泡沫，但三、四線天量「吉屋」待售，要頂住個雞棚，惟有任由一線城市樓價愈炒愈癲。

港股塘水滾塘魚

負利率時代下，近月物價也見拗腰回升，最後會唔會發展到滯脹的困局？現在下判斷無疑言之尚早，但可肯定通脹回升下，人行多多少少存有顧忌，好難肆無忌憚減息救經濟。兩會期間，國家隊出錢出力為股市營造良好氣氛，漸見力不從心，加埋尋日通脹數據後A股級級落，滬綜指跌超過百分之二，隊到貼近全日低位收2,804點，跌57點，一口氣跌穿多條平均線，睇落形勢並不是十分樂觀。

恒指連跌四日，港股一連兩日成交縮到得五百幾億，塘水滾塘魚，恒指收報19,984點，跌11點，主板成交542億元，創猴年新低。是日最佳表現藍籌係下周四派成績表的利豐（00494），收市升4.9%。

執筆時傳來歐央行議息結果，一如預期再度減息0.1厘，存款負利率擴大至0.4厘，並將每月資產購買計劃額度由600億歐元擴大至800億歐元。

下星期聯儲局議息，自從上星期公布熱爆的二月就業數據，債商取態，由早前斷言今年無得加，改晒口風話「三月唔加住」，到底年終美息番唔番到上1厘，肯定有排拗。

但值得留意，一月底開始，港燈（02638）及中電（00002）一路見有資金買住，股價浸浸上，中電仲創埋歷史新高（經股息除淨價計），傳統上真係純粹追求防守力，先會吼兩隻公共事業股，操盤手若非睇死美國（即係香港）十年八載都加唔到息，都肯定相當睇淡中港經濟，因為好明顯其他揩到少少地產的高息股，好似領展（00823）以及港鐵（00066）一類，近排股價郁都唔郁吓。

早兩日仲繪形繪聲，話有神秘投資者在街外密密收集英國品牌Burberry，仲揸到過5%，惹來收購疑雲，結果連家族持有、股權比格仔牌集中得多的普拉達（01913），都有理無理被炒到上四個月高位見31.25元，一陣陣「伏」味傳出，尋日外媒引述消息話滙豐託管股份，來自多名非單一投資者持股，前晚Burberry在歐洲市飛插完，尋日輪到普拉達狂插10.3%，收26元，連周二收市價26.65元亦都不保。

體品股一枝獨秀

全球經濟進入低增長年代，俄羅斯、中東甚至來自中國的客仔，消費豪情不再，對全球奢侈品牌營收衝擊，無疑是立竿見影，Burberry股價同A股一樣，自去年上半年見頂，從1,929便士的歷史高位，高台跳水，殺到落今年初1,047便士低位。

但奢侈品公司係咪抵買？睇落又唔係，因為股價未必及得上盈利下跌幅度，睇番歐洲奢侈品牌股份市盈率，過去幾個月都平均維持19至25倍左右，同○八海嘯期間，正式的「海嘯價」8倍幾相比，有一大段距離，格仔牌一六年PE約19.5倍，都係過去六年15至25倍範圍的中游水平，因為傳聞亂咁衝，好易會死人。

昨日匹克體育（01968）出成績表，全年賺3.92億元人民幣，按年升22%，業績創咗一一年以來新高。體育用品股經歷近三年的去庫存及店網策略調整後，幾乎肯定是少數在內地零售業吹淡風之下仍能夠交到唔錯增長的行業，今次匹克份成績比市場估計超額完成，亦都證實這個想法。

睇返舊年十一、十二月，中國硬着陸歌仔高唱入雲，基金唔理三七廿一，連體育用品股都質到七個一皮，經過尋日一彈，匹克高位跌幅同龍頭安踏（02020）的23.4%差唔多，但數落去業績預料對辦，而股價落得唔少的361度（01361）以及特步（01368），若呢兩日股價退一退熱可以吼實。