內地股市昨日尾段跌幅擴大，滬綜指埋單唔見2%，收報2,804點。港股都係一副「等運到」的格局，恒指在兩萬點關反反覆覆，結果微跌11點收場，全日成交僅542億元，股票經紀唔知仲要食幾耐穀種！本來諗住滬港通開通，會有利兩地股市資金流動，但事實證明呢個只係一個理想，至今無法實現！

A股精要

昨日午後傳來消息指人行允許商業銀行將企業不良貸款置換為股權，即係讓銀行由「債主」身份變成債仔的「股東」，眼前盤數可能會冇咁難睇，亦多咗空間放貸幫中央救火穩增長，但銀行的經營風險卻勢必增加。

雖則話內地主要銀行都係阿爺做大股東，要行呢一步冇得Say No，但老外們都被嚇跑，改革開放變相開了倒車。

昨日未見內銀股有異動，不過，在業績期前人行咁多動作，相信內銀即將公布的成績表都係瓜多過菜。面對呢類大是大非股，抽身離場隔岸觀火是最自保的方法，近期大市成交，大概亦說明了大部分人的看法。

去產能後續問題多

內地煤炭及鋼鐵業正設法加快去產能，其中，昨日有內地傳媒指，二十七個省份明確將「去產能」作為今年工作重點，其中重慶、貴州、甘肅、廣東、山西、河北、河南等多個省份紛紛制訂細化方案和試點計劃，重點是淘汰落後產能，殭屍企業退出、戰略性兼併重組，以及國企內部改革等。

嚴格而言，呢啲唔係咩新措施，只是到了地方層面，有幾大力度去執行，畢竟企業關了，工人下崗，政府失稅收，地方經濟受考驗，九百幾樣問題跟尾，唔係話響應政治口號咁簡單！中央有咩辦法確保政策落實執行，才是關鍵。

也許，若然要短線博煤炭及鋼鐵股，鋼鐵股會值博啲，因在去產能的規劃較為明確。三隻鋼鐵股最近都升抵阻力位見阻力落，重鋼（01053）受制於1.2元、馬鋼（00323）受制於1.6元，鞍鋼（00347）受制於3.8至4元區域。

但三者之中，鞍鋼的走勢較佳，若完成整固成功突破，下一個較大的阻力區在4.3至4.5元，回吐未宜失守3.3元。