Fundman睇市：百麗下跌風險有限

昨日超過900隻股票見紅，比上升股份多出一倍餘，受惠低油價的國泰（00293），公布業績去年多賺九成，股價升4.9%收14.04元，是表現最標青藍籌；國際銀行CDS違約風險掉期溢價繼續回順，跨國銀行股撈底之風潮未止，滙控（00005）再升1.6%，渣打（02888）升0.2%。

唔經唔覺，今浪渣打由低位42.55元，短短九個交易日彈咗十蚊，順利到達小弟早排建議撈底的第一個目標50元。值得留意，十一月供股價55.6元，應該有唔少飽食驚風散的捧場客，會選擇食少多覺瞓，將供股貨滲番出街，尋日見彈到53元頂到實，低位撈咗貨嘅，不妨考量趁52元左右開始食胡。

炒風短癮易中伏

美、歐、日三大經濟體，近三、兩個月的製造業PMI數據，都好似鐵達尼一樣向下沉，二月內地出口數據更差到無朋友，美元計價急跌25%創七年新低，即使首兩個月計，亦要跌一成二，比去年有進一步惡化趨勢，無疑，現時基金經理手頭現金比重頗高，調查顯示，股票基金持現金比例，創○九年後新高。

傳統智慧話，股市贏家永遠站在羊群對面，今日十個投資者九個淡，橫睇掂睇，都只有逆向思維，轉投好友行列先有機會搵到食。不過，客觀經濟環境未見黑暗盡頭，整體大市又好，板塊又好，都缺乏一個長炒長有的復甦故事，落鑊故事愈炒愈短。

早幾日長汽（02333）二月銷售數據好，成板車仔股升到爆廠，到吉汽（00175）周二傍晚麻麻地的二月銷售數據曝光，板塊立即掉頭隊到開巷，稍為唔夠貼市都死得人，更遑論失驚無神爆升，由落鑊到熄爐收火時間更短的二三線股。

國際油價短短一個月內，由26美元冚到上38.4美元，累積升幅四成七，產油國各懷鬼胎，盛傳的減產只聞樓梯響，伊朗、俄羅斯肯定唔配合油組減產，中國製造業毫無起色，令人懷疑，經過二月中的一輪油市淡友冚倉過後，油價好快又會打回原形，回到低位浮沉。

事實上，油組一哥沙特莫財，且全國有近一成五至兩成的油產力，在安撫其他油組成員下停工，油價一彈可以隨時恢復供應，如果油價返到40至50美元之間，唔少美國被叫停的頁岩油生產商，都必定蠢蠢欲動開總制重新供油，前晚油價穿頭破腳，可能是短期反彈結束的信號，未來好大機會於30至40美元間，維持有波幅無升幅的態勢。對受惠低油價如航空業之類，幫助不言而喻，但新能源如混能及純電動車等的發展，恐怕前路艱難。

零售股盲門當旺

有傳港府建議增加自由行城市，不管是否屬實，昨日輪到零售股發威，卓悅（00653）、先施（00244）、普拉達（01913）、堡獅龍（00592）以及利郎（01234）等均有不俗表現，利郎昨公布全年多賺13%，但其餘零售股業績恐怕見倒退，捧零售股屬盲門，惟現時各個板塊輪流炒，零售股變成追落後。

中國出口慘不忍睹，未來GDP更要倚靠消費，所以「兩會」提出提高赤字，以減稅方式刺激消費意欲。中國工資年年以雙位數增長，儲蓄率又高，消費能力毋庸置疑，只是打貪影響奢侈品而已，但一般消費仍保持中高速增長，體育用品便是一例。普拉達昨急升8.8%，由低位計更反彈逾四成，可解釋為從80元跌至20元後的超賣反應，亦由於近期出現奢侈品的併購個案，使板塊的估值得以重估。

「鞋王」百麗國際（01880）季度同店銷售每次都令人失望，每次公布後股價例跌，但去年中期業績其實不差，主要是波鞋賣得，抵銷女裝鞋的倒退。公司年結在二月底，一五/一六年市盈率8倍，周息率7厘幾，加上有70多億元人民幣淨現金，真係爛船都有幾斤釘。今年兩個多月以來，百麗股價大部分時間只在5元至5.5元之間窄幅上落，同個市大幅波動完全扯不上邊，雖然亦屬盲門，但現價位其實下跌風險相當有限。