隔晚道指跌過百點，昨日港股延續調整勢頭，但尚未觸及頭肩頂頸線已見支持，恒指由早市最多跌193點，到最後收窄至跌15點，收報19,996點，主板成交進一步縮減至569億元。

昨期指早段在19,813點搵到支持後，15分鐘圖上的浪底逐漸推上，尾市主動買盤稍勝一籌，日市以貼近全日高位收19,990點，低水收窄到6點，成交不足9萬張，是轉三月倉以來最奀，昨日淡友未趁機會測試19,758點的頸線支持，表現比筆者預計更好，假如歐美市況回穩，不排短線調整完成後發力再上。

大市成交再次縮減，看來基金大戶自覺睇唔透後市，索性減低參與度，後市要更上一層樓，務必要短期再出現大成交突破，吸引更多基金補貨潮持續，否則可能在兩萬點水平或樓下，再跌入愈玩愈奀的悶局之中，今日等機會先在19,900點附近補回三分一注好倉，即市的止蝕訂於19,770點。