兩會進行中，市場對政府工作報告反應偏向正面，滬綜指高收，但港股就反反覆覆，恒指微跌16點收市，反而國企指數跑贏，升68點，收報8,626點，算係近期少見。不過，筆者總擔心，呢個升浪玩到兩會完結前就會無影，皆因踏入月中下旬，市場焦點又回到海外市場，所以要謹記，依家唔係大時代，順勢短炒只宜小注，見好識收，且嚴守止蝕！

A股精要

農業部長話，國民到海外搶購奶粉乃奶業人的恥辱，說得甚是，到底是業界「無恥」，抑或行業發展有問題，令業界都有心無力呢？簡單講，問題都出在「信心」兩個字！如何才能挽回消費者對本土乳品的信心，這必要從品質和監管的根本問題做起，惜毒奶事件至今，進展不太令人滿意。

基建股可睇中車

國家要在二○年實現全面小康社會，大概提供安全乳品是一個好基本的要求，五年時間，乳企必須要有大作為。蒙牛（02319）自泊得中糧系大碼頭之後，業績按年改善，要押注內地乳品股未來五年的發展，蒙牛應該是核心之選。

回說昨日市況，煤炭、鋼鐵、基建、汽車股都有追捧，是全方位的維穩。之不過，有結構問題的煤炭及鋼鐵類股份，高追都係可免則免。相對值博的會係基建股，走勢上中鐵（00390）、中鐵建（01186）及中交建（01800）都先後成功考驗50日線過後再展升勢，且成交增加，想追落後，可以留意吓中車（01766）。

此外，汽車股走勢亦甚勇，久違的長城汽車（02333）連續兩日現大陽燭，股價突破6元關後頭也不回，昨日曾高見7.08元，乃去年十二月上旬以來首次重上50日線樓上收市。

另一隻值得留意的汽車股乃北京汽車（01958），股價由上周初低位5.33元，已消化盈警消息，昨日股價一度回升至6.39元，上周低位計累升幅度近兩成。預計北汽奔馳及北汽現代今年都有新車型推出，料有助穩定盈利表現。走勢方面，短線回吐主要支持在5.8至6元區域，守穩其上，有勢反覆向上回補年初的下跌裂口位7.1至7.3元。