Fundman睇市：龍頭內房值得低吸

股市熔斷聖手，前中證監主席肖鋼下台興奮唔夠一陣，A股又再打回原形，尋日急瀉，猴年初至今升幅一舖清袋，累埋港股尋日浸浸落無段好睇。滬綜指埋單急瀉6.4%，內地線話近排A股水頭確實無年初咁旺盛，亦有分析話今日上海舉行的G20峰會，可能有針對競爭性貶值、操縱匯率的議題，但橫睇掂睇都唔係理由，底子唔好兼且大媽反應過敏，加加埋埋先可以引爆尋日千四隻A股跌停的悲壯場面。

業績股繼續插水

港股都算難兄難弟，昨超過1,100隻股票插水，恒指收跌303點，主板成交增至636億元，反映等出貨的愈跌愈心急的傾向。近排業績期，已經見係又插唔係又插，對業績抱有一絲希冀，望超額完成等股價彈番多少，輸少當贏的，都陸續打定輸數。滙控（00005）以及渣打（02888）昨再跌1.9%及4.5%，踏入一六年僅僅兩個月，兩股已經累積跌22.9%及34.7%，重磅股好似二三線咁隊法，真係輸死人無命賠。

今次中國經濟有幾大鑊，已經唔使花口水多講，自去年中A股政策牛瓜柴，股市救經濟如意算盤打唔響，出口貿易唔得，內需又谷唔起，樓市變成經濟最後防線，望透過財富效應頂住，為人民幣貶值刺激外貿復甦爭取更多時間。中央今年以來不斷釋出拯救樓市的信號，本月更調整房地產交易環節契稅及營業稅，粗略統計內地已有超過130個城市出台去庫存新政。

事實上，樓市在內地固定資產投資擔當着重要的角色，內地固定資產投資持續下滑，當然與疲弱的樓市有密切的關係，加上建材、鋼鐵等行業產能過剩仍存在，若樓市回暖，將有助中央達到去除過剩產能的目標。

然而，昨日有消息指深圳市政府正研究採取措施調控房地產價格，而廣州地稅局則暫延實施「跨區首套」契稅優惠政策，似乎廣州以及深圳與中央刺激樓市的政策出現背馳，難免令投資者感到疑惑，內房股昨日跌到一仆一碌。

目前全國剩低北京、上海、廣州、深圳及三亞五個城市，依然行緊限購，而相對於北京同上海，深圳限購條件較為寬鬆，對非本地戶籍人口置房條件，與京滬睇齊唔出奇，不過在當前環境下，太大手筆加辣，睇怕阿爺未必肯過佢。假如內房因為消息落多兩、三日，又可以諗諗佢。當然兩隻藍籌內房中國海外（00688）及華潤置地（01109）是不二之選，始終規模實力有番咁上下。

長建高追唔划算

昨收市後傳來長建（01038）獲納入恒指成分股，取代華潤啤酒（00291）的藍籌席位。唔講唔覺，呢個二月長建股價迭創歷史新高，前日一度高見78.2元，昨日收報76.65元，也許已一定程度預先反映咗利好消息，高追可免則免。至於華潤啤酒，業務重組過後，市值規模同交投都今非昔比，被剔出乃在預期之內，相信芬佬亦經已一早做晒嘢，如今正式失落藍籌席位，話唔定股價反而會否極泰來！

舊年聖誕前炒過隻IMAX中國（01970），一出業績嚇到唔少捧場客腳震，去年底止年度蝕1.82億美元，對比前年的2,278萬美元盈利，來回差咗近2億美元，昨股價由開波44.5元殺到落40.7元，之後先見大孖沙逐漸買番上去，收報43.9元，跌幅收窄到2.4%。

份業績由黑變紅，全因一次過損失，為轉換期權公允價值調整撥咗2.1億美元，唔計呢條數，實際賺4,340萬美元，升六成七，勝過街上預測，再睇去年收入同埋今年預計再增加100塊屏幕的數字，都係高於分析員估計。

個市差咗咁耐，難怪人人都好似驚弓之鳥，尋日一插，短期低位應該見咗，由聖誕前高位60元碌落嚟，又真係跌到過晒龍。電影院產業已經係極少數內地仲有增長的生意，舊年公司在大中華票房收入升五成三，勝過全國電影票房收入增長的四成六，加埋今年屏幕的擴充，短線先睇佢衝唔衝破到50元關。