樓市出更：新盤谷旺爭相報喜

新盤市場百花齊放，作為猴年首個開售上車新盤嘅元朗映御，發展商新地（00016）昨日截止接受認購，率先報嚟喜訊，累積收到1,439張入票，較今日開售138伙超額認購約9.4倍。另長實地產（01113）元朗娉廷都爭住報喜，項目喺短短四十八小時內連沽3伙，套現約5,200萬元。而恒地（00012）馬鞍山迎海．御峰最快今開價加入戰團。

新地張卓秀敏（左）表示，映御今日開售會有2個新地會優惠名額，送出逾10萬元足金擺設。

恒地馬鞍山迎海．御峰示範單位料明日起開放。

長實封海倫透露，娉廷四十八小時內售出三座洋房。

新地以低價出擊嘅映御，連日嚟收票反應踴躍。新地代理業務部總經理張卓秀敏昨日同劉Sir喜報，項目昨日五點已經截止接受認購，累積收到1,439張入票，當中包括28張地產代理入票，由於反應十分理想，最快今日再加推單位。項目今日會分兩節銷售，每節首名合資格新地會會員買家，將獲贈價值約50,061元足金擺設，兩個名額優惠總值超過10萬元。

長實地產高級營業經理封海倫都話，娉廷喺禮拜三以招標形式賣出40號屋，成交價1,725.1萬元，呎價10,702元，項目喺短短48小時內連沽3伙。目前仲有5組買家有意大手掃入兩座或以上洋房，集團諗緊向大手買家提供特別折扣優惠。

迎海．御峰料明睇樓

百利保（00617）執行董事兼首席營運官范統昨日帶隊入元朗參觀富豪．悅庭現樓洋房，佢就話，最快四月開盤，傾向招標形式推出，首批估計最多推10間，考慮提供二按。

另外，恒地營業（一）部總經理林達民透露，迎海．御峰最快今日開價，示範單位料明日起開放，發展商會提供樓價八成半一按，大手買家將優先安排揀樓。

敦皓刊樓書涉111伙

港島方面，豐泰地產資產管理區域董事吳財琴話，西半山敦皓嘅樓書昨日上網，項目提供111伙，當中三、四房山景大宅佔61伙，實用面積1,235至1,381方呎，另設6伙實用面積483方呎開放式戶。負責項目銷售同推廣嘅阿米巴董事黎漢群補充，示範單位今日起開放畀特選客戶參觀，計劃下月推出，定價參考干德道新盤，當被問及呎價是否至少3萬元，她笑言「都值啩」。

太古地產（01972）西半山瀚然推兩伙特色戶標售，其中51樓頂層戶，指引價2億元，呎價近7.2萬元；而50樓單位，指引價1.75億元，呎價近6.14萬元，將於下月十八日截標。另據一手銷售資訊網資料顯示，信置（00083）大嶼山Botanica Bay推出6座獨立屋，於下周一標售。