昨日已指出，今浪反彈最肉酸地方是指數愈升成交愈奀，對短期要挑戰19,770點阻力，打破一浪低於一浪的中期形態相當不利，加上周五期指結算轉倉，未見挾淡好友積極部署，果然昨日來先個短暫調整。

恒指收市跌222點報19,192點，尚幸午後由低位19,060點逐漸收復失地，收市守得住20日線，走勢上未至於把之前反彈氣勢全盤推倒，惟主板成交僅606億元。

三月期指昨以19,278點開出，早段淡友相對主動，攻到落19,179點，之後買盤反撲，見19,280點貼近開市價已經無法再進，整個上午一副尋底姿態，最低曾見18,981點，整個午後牛皮，日市以最後19,062點結束。筆者手上的二月期指好倉，在早市稍高於19,300點的成本價止賺，有胡唔食結果得餐茶。

恒指未穿20日線，2日線在19,303點，亦企在20日線之上，走勢未至於一面倒，但成交太奀，明日二月期指結算，業績期第一波曝光成績表，有好又沽差又沽的情況，今日乜都唔做，睇定至算。