金管局放風指樓市若確認進入下行周期，將適度「減辣」，有心置業的人士若然憧憬按揭成數有望放寬，不妨搵定目標，等待時機來臨入市。想平住荃灣區大型屋苑，大可瞄準背山面海的麗城花園，踏入猴年部分放盤業主擴議價空間，兩房及三房戶均有叫價回歸一四年價的放盤，上車、換樓諗得過。

麗城花園是荃灣西老牌大型屋苑，社區配套齊全。

麗城花園各期位置圖

麗城花園是荃灣西老牌大型屋苑，坐落青山公路荃灣段，雖然遠離荃灣市中心，交通不算方便，但勝在臨近海濱而建，坐擁背山面海優勢，居住環境並不失禮。

屋苑另一賣點是規模夠大，配套設施齊全，街市、商場、學校、美食中心及公眾體育館等樣樣有齊，生活自給自足。

新春後擴議價空間

值得一提是，自西鐵通車後，沿海濱長廊步行十分鐘即達荃灣西站，為住戶提供多一個交通選擇。

區內代理指，麗城花園供應不同尺碼的入市選擇，樓價又長期低水，吸引上車、換樓客捧場。特別是環球股匯動盪，加上長假期效應，過去兩個月屋苑市況淡靜，部分放盤業主於新春後擴議價空間，兩房及三房戶不乏減價盤選擇。

Budget有限首選一期的兩房戶，現時四球有交易；三房戶選擇更多，換樓初哥首選二期，入門版三房戶460萬元有交易，重返一四年做價，平過不少市區兩房戶。鍾情海景可揀三期三房樓王戶，750萬元起日日有藍巴勒海峽醉人景致相伴。