Fundman睇市：神州數碼吼位上車

回顧今浪油價跌勢，始於沙特為首的油組國家為撲殺美國頁岩油出口於萌芽之初，恃住其每桶油產出成本僅4至5美元，一四年底誇下海口，話即使油價跌到20美元都唔會減產，點知期間渴油的中國經濟愈走愈疲，伊朗又力圖恢復石油輸出，結果沙特一語成讖，油價真係落到二字頭。

油價反彈有限度

話說回頭，環球經濟唔掂，尤其中國GDP破七見六，從需求角度油價固然難以大升，即使油組肯減產，彈返到四、五十美元，已紛紛拉閘停產的頁岩油礦井肯定蠢蠢欲動復工，令油價呈有反彈無大升的局面。

現時成個市仲係望油組可達成共識減產，不過重點唔係關心石油石化產業財政崩壞，而係一些跨國銀行相關融資變成壞帳。事實上，近日國際銀行股股價，同早兩年狂發的CoCo Bonds，跌到阿媽都唔認得，油組如果可以出手托一托價，可以預料，成個金融市場避險情緒都可以起到紓緩作用。

港股連升兩日後又再腳軟，昨早市升過一陣之後，石油股帶動恒指中段級級落，埋單跌197點，收18,924點，主板成交得669億元。中央傳又「放水搞基建」，建材股昨集體起動。水泥股可謂相當低殘，龍頭股安徽海螺（00914）由30元以上跌至最低13.7元，中國建材（03323）更由9元多跌至3元以下，集團已發盈警，指一五年純利將下跌七成以上，市盈率將升至8倍多；海螺則暫未發盈警，但以首三季盈利僅倒退25%而言，估值可能較中建材更便宜。

建材股一五年有一個接一個的憧憬，一帶一路、減息、重組，到年底又推「供給側改革」，積極淘汰落後產能。不過，水泥業削減產能已經講咗好多年，但一直仍是產能嚴重過剩的行業之一，加上房地產開發投資大減，行業盈利陷於谷底。雖然中央有意再催谷基建業，但對水泥需求影響最直接的還是房地產，在下月兩會最關注的亦是房地產去庫存，惟長遠仍最主要視乎經濟狀況。

周二中國水泥價格指數（CEMPI）報78.12，較去年同期之97.5下跌近兩成，過去一年跌勢一直未止，猶幸成本亦告下降。每年首季亦是水泥業的淡季，春節前後開工不足，加上水泥價格仍然低迷，不但去年業績差，今年首季也不會見起色。

水泥股首選海螺

該板塊已跌至相當低殘，如果水泥價格出現反彈，即使短暫也好，亦見相當值博率。其中中建材最低殘，但穩健程度首推海螺，去年在極惡劣形勢下，仍保盈利未有太大倒退。

老牌液晶顯示屏生產商精電（00710），向京東方大折讓發行4億股，後者因此持精電過五成股權，變相賣枱，申請豁免全購之外，新買家亦承諾，唔會收取考慮於交易完成後派發的每股1.35元特別股息。精電中期業績因出售資產倍翻，單計持續經營業務則增長兩成許，表現唔錯，扣特別息及假設新注入資金短期無盈利能力，作價是10倍開外，唔算太低，但不涉及強制收購，新主點樣玩法有待觀察，尋日高位盲搶要識得止蝕。

中國大力推動資訊科技配合舊產業發展的「互聯網+」概念，在傳統製造業一池死水下，龍頭神州數碼（00861）係唔少港股基金的避風港，事實舊年大時代插到落5.82元之後，股價表現相對平穩，慢火煎魚上番8元樓上。

去年首三季公司業績微跌10.8%，最主要都係第三季人民幣貶值產生的8,000萬元匯兌損失拖累，撇開一次性影響，同大行預測單位數至一成左右的增長差唔幾。一直等機會上車，但見舊年十一月開始，三次落到8元都好快拗腰上番去，昨一早見大戶轉倉，股價壓咗落嚟，再試8元的話可吼佢，論基本因素好而大政策都啱嘴型的股票，市場上真係買少見少。