A股高收，但港股卻先升後回，恒指跌近兩百點收場，萬九點得而復失，國企亦失八千關。呢期環球股市都係你睇我、我睇你，未有足夠力量支持單一市場異軍突起並主導整體市場氣氛。

A股精要

中國現代史告訴大家，經濟改革絕不能將破舊與立新成對立，否則改革成果未見，體制青黃不接將造成更大危機。就如眼前要推動經濟結構改革轉型升級，並推動新興產業發展，兩者必須取得平衡。繼八部委聯合發文要求加大金融支持工業力度後，發改委亦強調傳統行業去產能的同時，不會引發失業潮。

事實上，就業市場穩定是社會穩定的重要基石，在處理產能過剩問題上，如何既去產能而能保住工人飯碗？在新經濟創造更多新職位取而代之是其中一個辦法，但這是知易行難，皆因工廠工人一下子難以改行做服務業，最慘回到農村，這些年就連耕地都拿去發展基建樓房了，想耕田都冇地。所以話，中國問題真係一啲都唔簡單！

有評級公司話，中國評級有壓力。睇嚟老外們要做空中國，實行大合奏出口術。慶幸今天中國市場尚未完全開放，真係有大危機，最多落閘控制場面，即使略為推遲改革開放步伐，亦在所不惜。前日傳來產油國凍產而唔係減產，油價同三桶油現回吐。但睇形勢，真係跌到落高盛價每桶20美元，班產油國都要接受現實減產，咁睇落巴菲特係咁收集石油股，真係幾有道理！

憧憬下月公布業績

講番個股，周初提及的華能新能源（00958）再升12%，表現令人喜出望外！至於昨日推介的中海物業（02669）回吐2%，總之失守0.8元就沽之哉。今日就睇吓隻統一企業（00220），昨日一度高見5.32元，收報5.13元，逆市升0.59%，公司將於下月十八日宣布末期業績。

統一舊年中期業績大有改善，純利同比增長93%至6.86億元人民幣，估計相對前年全年純利2.85億元人民幣，嚟緊公布的年度業績唔會差，難怪近月吸引多家大行關注，其中大和同高盛都將其評級調升至「買入」，美銀美林雖然下調其目標價至6.5元，但評級亦維持「買入」。

若短線大市再現波動，此股跌至5元邊或樓下，可以考慮人棄我取。以一六年度預測市盈率24倍計，合理價睇6元。