港股尋日終於來個大反擊，承接上周五晚歐美股市的升勢，恒指裂口高開347點後，最多升逾六百點，最後以接近高位18,918點收市，全日升598點，國企指數則升358點，收報7,863點，升幅分別3.2%及4.7%。

二孩政策對蒙牛產品銷售的推動作用如何，仍要時間觀察。（資料圖片）

至於內地股市農曆新年假期後復市，滬綜指結果紅盤低收，跌17點，收報2,746點，兩市全日成交只有3,289億人民幣，較假期前最後一個交易日減少350億元，創近期新低。

港股方面，尋日全日成交金額只有664億元，未能配合升勢，睇格局似係推高重磅股挾高指數，從技術走勢來看，恒指即使仲有得升，相信於10日同20日線水平約19,150點已有很大阻力，分分鐘個市彈完之後再插過，短期下試18,000點關口的壓力猶在。

後市表現要睇油價

上個禮拜五晚，歐美股市反彈，主要由於市場憧憬石油輸出國組織減產，帶動油價回升。目前，環球金融市場都係睇住個油價，若油價再次掉頭下滑，全球股市都唔會有運行。另外，尋日內地公布一月進出口數據，其中出口下降6.6%，進口下降14.4%，數據表現仍然疲弱，相信今年內地經濟下行壓力持續，A股仍然面對很大的挑戰。

在大市回升帶動下，尋日主板有1,175隻股份上升，下跌的只有218隻，個別重磅股的升幅仲勁過股仔，好似隻渣打（02888）全日升逾一成，至於中資金融股反彈力度亦相當強勁，平保（02318）反彈6.4%，表現突出。雖然大市尋日係威係勢，但阿莊覺得後市仍然隱憂處處，投資者不宜開心得太早，如果撈咗貨宜見好就收，切忌大貪。

蒙牛乳業（02319）昨日亦隨大市反彈5.3%，以11.78元收市，蒙牛自去年四月高位累積跌近六成，近日於11元附近現承接。除受大市影響之外，由於乳品市場終端需求仍然疲弱，原奶供應量多，而蒙牛奶粉存貨仍然高企，在減價促銷壓力增加下，股價難免受壓。

近年集團積極拓展高端奶產品，雖然其增長速度理想，但不足以彌補傳統產品銷量及價格下滑帶來的影響，因此集團的經營仍要面對很大的挑戰。中央今年開始實施全面兩孩政策，但之後出生率會否顯著上升，同時帶動乳品需求增長，仍要時間觀察，因此在基本面仍然未能得到顯著改善下，相信長遠難以支撐蒙牛股價繼續上升，估計於100日線13元水平，已有很大阻力。