港股昨日隨外圍反彈，恒指升598點收場，成交664億元，話多肯定唔係多，但話少，今年兩個月未過，恒指經已打咗八五折，唔少股份股價「折扣」更大，成個金魚缸價值縮咗水，咁計落其實六、七百億元成交額，都唔算太少了！

A股精要

春假完結後，內地A股昨日復市，猴年紅盤低開低收，但論跌幅算係好溫和，只係滬、深兩市成交得三千多億元人民幣，人氣低迷。事實上，自去年中央救市之後，限制沽空同兩融額度，市場只能單邊睇升，但經濟氛圍不容許大多數人做好友，結果手頭的股票出唔到，亦未能以淡倉對沖風險，手持現金亦唔會去買貨。

呢個困局，說明內地股市仍然封閉，亦提醒海外投資者中國市場的獨特風險。雖說非常時期用非常手段，但太多違反市場定律的動作，到底還是不利金融改革和市場開放，政策制定者必須懂得平衡利害，以免搬石砸腳！

「十三五」規劃有啟示

回說昨日港股，其實中資股氣氛係有改善，好似股價由去年高位20元，回落至上周五低位僅剩4.94元的長城汽車（02333），昨日股價反彈一成，收報5.47元，成交接近3億元；新能源股龍源電力（00916）、金風科技（02208）分別升12%及9.6%。

同屬新能源板塊的華能新能源（00958），股價反彈約一成，收報1.56元，主要是公司最近公布一月份營運數據，月內之總完成發電量按年增長四成，其中風電發電量及太陽能發電量分別增長42%及19%，表現勝預期。投行美銀美林就將其評級上調至「買入」，以反映公司現時估值吸引，但就將目標價由2.8元下調至2.5元。若以昨日收市價計，潛在上升空間仍有逾五成。

基本上，「十二五」規劃支持新能源行業發展，相信進入「十三五」規劃，這個政策只有進而不會退，有部分資金在兩會前開始小試牛刀落鑊小炒新能源股，並不足奇，若市況逐步回穩，呢類股倒值得望多兩眼。觀華能新能源走勢，若短期能企穩1.6元樓上，反彈可持續，目標反覆向1.8至2元阻力區推進。