80後樂做樓奴 伺機換貨

本身是中原地產副區域營業經理何鑫，從小於公屋環境長大，即使不是家境貧窮到要日日粗茶淡飯，但仍想撇去「屋邨仔」面對的枷鎖，「我以前想屋企裝修，加一啲理想裝飾，但家人好反對，話公屋最終會畀政府收番，整咁靚都無用。所以我同自己講，人生最大的目標係搬離公屋，要有自己層樓。」

畀完首期借錢擺酒

一一年，當年只有二十六歲的他，工作七年，但用兩年時間終於儲到首期上車。他決定承做九成按揭，以首期16.8萬元買入粉嶺欣盛苑的已補地價居屋單位，實用面積400方呎，樓價168萬元。「當年因為結婚需要，太太同屋企人住唔慣，要買層樓自住。嗰陣記得拎咗筆錢畀首期之後戶口已經無錢，連擺酒的錢都要問父母借住先，之後再還。」

為上車何鑫可以身無分文，當時人人都覺得博得太盡，樓市一跌就有機會一鋪清袋。但因為一刻的決定，何鑫現時的身家已經翻近倍。以同類單位比較，最近一次的成交額為300萬元，較五年前升值近80%。最近，樓市出現逆轉，他再次萌起買樓的念頭。不過，不同的是，今次他是有備而來的。

「一來有了兩個小朋友，400方呎唔夠用，二來想有工作動力。人有惰性，任何情況下，我都唔想過太安逸的生活，有供樓壓力自然會努力工作。」他續指，「點解做樓奴就一定唔好？本身為供養子女，要做佢哋嘅奴隸，再供埋樓，我都好願意做樓奴，我奴性好重。」

他提及，房子不夠住皆因兩個孩子「霸佔」了他的私人空間，本來於書房工作的他都轉移至廚房，「平時食飯、夜晚跟同事、客人講電話都會喺廚房到做，廢事嘈到小朋友。所以而家想換個三房兩浴室的單位，咁就可以唔使爭浴室，又可以有間書房。」

再者，現時每月供樓為5,000元，對於現時家庭收入為年薪100萬的何鑫來說，可能只是九牛一毛。供樓壓力小，何鑫決定再買樓供多層。「有供款壓力就會畀心機做嘢，趁後生可以供三十年，而且覺得喺工作上，我仍然有好大發揮空間。如果做代理的收入支持唔到供樓支出，大不了轉去做地盤，做地盤一定供得嚟。」

儲三百萬換大單位

他表示，五年間，工作上稍見成績，已儲逾300萬元資金，準備買同區600萬至800萬元的單位，面積冀為1,000方呎。「如果買二手樓，做六成按揭，加埋濕濕碎碎的支出，唔夠畀嘅話就可能賣咗而家層樓。但如果買新樓，做到八成按就唔賣。」每月供款方面，他考慮由每月供5,000元增加至月供20,000元。

何鑫三十而立，認為再買樓算是成功的象徵，更揚言，「公屋轉居屋，居屋轉私樓，最後希望可以向House進發。」事實上，一一年他在樓價起飛前上車，已經較其他八十後幸運，現在有需要換樓的時候，樓價出現回調，似乎買樓時機再次出現。

他認為，自己能夠上車是一半好彩，一半靠自己。「機會係留畀有準備嘅人，首期一定要儲定。我個人都未必一定睇準樓市，只係你認為佢會跌就唔去買樓，到佢真係升嗰陣，你又唔會買，結果就會更加難上車。」他又稱，「樓價升跌並唔太重要，因為升嗰陣，你買層樓都會升，跌嗰陣，就可以買更加便宜的樓。」

搬大屋開支勢加碼

八十後何鑫把握樓市逆轉時機，決定細屋搬大屋，享受更優質的生活環境，但換樓涉及的開支，往往比首次置業更多，換樓後的家庭開支亦將會更大。

涉稅項佣金等

自一四年公布新辣招後，業主想買第二個物業時要先繳交雙倍印花稅，稅率為1.5至8.5%不等。但樓換樓亦需預先繳交雙倍印花稅，如半年內將唯一舊有物業出售，便可申請退還新舊印花稅差額。

以何鑫為例，他計劃買入600萬元的單位，雙倍印花稅為6%，要先繳付36萬元的雙倍印花稅。同時，首次置業涉及經紀佣金為一個單位，惟樓換樓則涉兩間物業的佣金、律師費及雜費等。

另外，今次何鑫決定細屋搬大屋，除了有更大的供款壓力外，就連管理費及差餉亦相繼增加，所以換樓人士要諗過計過。