周二晚，華爾街受油價急挫氣氛影響，三大指數大幅回落，打窒了港股反彈勢頭，昨期指裂口開低442點後，淡友隨即展開攻勢，殺到18,733點至收手，在連跌三日，加上短期信號已嚴重超賣，十點後方見零星冚倉活動，稍為推高指數，但怯於形勢的好友，明顯是不願積極進攻。

期指昨最高見19,029點，最後一小時交易時段上落幅度有限，最終日市以18,978點結束，低水14點，成交11.8萬張。國期收7,852點，低水6點。

真係有胡唔食罪大惡極，昨裂口開低於止蝕價，手上四分一注好倉由贏變輸，昨日跌市主板成交反而增至786億元，反映現貨沽壓之大。

仲有兩日春節長假，未脫離有反彈無大升的市況，要博反彈難，要敢在現水平加入空軍，更是難上加難。留意美股，今浪道指由15,450點反彈，高位16,510點現十字星轉勢信號，過夜要變相賭美股無謂，一於提早收爐。