全世界將矛頭指向中國，話中國經濟將會硬着陸，人民幣最多會貶四成，國際巨鱷紛紛大手沽空人民幣及港幣，總之有咁兇險講到咁兇險，但其實搞到今時今日全球經濟衰退，禍源係美國，只係人家在財技上始終高一層次，七年量寬將「炸彈」成功輸出，金蟬脫殼不單止，仲要反手沽空中國，你話邊個夠佢惡？

A股焦點

有指上大人近期對A股保底放軟手腳，原因係要造就低位等稍後養老金入市。是否如此，不得而知，但好明顯，養老金入市係中央維護金融市場穩定的其中一張王牌，唔到最惡劣的環境，相信都唔會貿然出招。從另一角度睇，這些年中國經濟發展亦實在累積了好多問題，經已去到好嚴重，不得不正視的地步，既然今屆政府有決心應付，趁呢次機會置諸死地而後生，亦未嘗唔係一條出路！

兩會議題成焦點

值得投資中國市場的投資者關注，中紀委近日表示，國企和金融機構普遍組織渙散紀律鬆弛。誠然，過慣過往的官場生活，如今要做過「清廉」官員，日子當然唔好受，作風散慢甚而辭官下海的亦唔少，只係如今經濟唔好，下海的機會亦較以往減少。但說到底，依家內地改革進入攻堅期，最須要官吏全力以赴做到最好，到底國企改革如何能提升國企等高層的積極性，倒是一個棘手問題。

從這個角度看，更顯得「國企改革」這概念表面上好宏偉，但實際上卻阻力重重，每次因為這四個字而炒起的國企股，不宜高追，反而是趁高沽貨獲利的時候。二月份開局淡靜，國策股都無人吼，也許正好提供低吸機會，等放完長假回來，投資者開始聚焦三月初兩會議題及一眾國策概念股，就係時候沽貨獲利。

內險股中，國壽（02628）股價已回落至一一年以來的低位17至18元水平，等在17元邊小注一博未嘗不可，但有心理準備要坐一坐，反彈目標重上20至22元區域，失守16元止蝕。至於平保（02318），較理想是在30至32元水平上車，首季尾次季初反彈目標睇38至40元，失守28元止蝕。