油價波動，股市就跟住日升日跌，總之舞到你頭暈，短炒捉錯路隨時左一巴右一巴！好似前日港股食「彈散」，但前晚油價反彈，加埋A股昨日先跌後回穩，港股昨日又彈番上19,000點樓上。為今之計，若閣下覺得心儀股份估值到了理想的中長線買入價，就分注行事，少理指數升跌，盡量避免短炒，以免消耗鬥志。

A股精要

滬港通昨日有異動，滬股通資金流入額達到44.85億元人民幣，港股通上午亦一度錄得逾10億元人民幣流入，全日收市流入額都有8.9億元人民幣。兩地股市估值係咪經已跌到足以令兩地基金經理心動入市抄底的地步，不得而知，反正流入金額尚不算太多，即管密切留意數據變化，再下判語。

接近農曆新年的旺季，濠賭股昨日開始見到有資金流入，博旺季炒一轉。講到新春，有術數專家話，下周四立春過後股市就會有轉機，呢啲信不信由你，反正呢個一月班淡友都經已贏到嘔，結算後市況回穩休養生息亦符合劇情推演，只係經歷過呢幾日大上大落，筆者認為中長線行事唔睇指數表現，咁頭腦可能會清晰啲！

國策支持利發展

國務院公布《中國的核應急》白皮書，表明將建設核電強國。惟見核電設備股僅個別發展，其中上海電氣（02727）前日股價創下52周新低3.06元後，昨日反彈3%，收報3.2元，成交7,223萬元。

上電主力做高效清潔能源、工業裝備、現代服務及新能源四大業務範疇，其中前三者的收入佔比均逾三成。截至去年中期為止，公司在手的核電核島設備訂單約147億元人民幣。國家要支持行業發展，行業龍頭企業自然是扶持對象。早前上電的資產重組已獲上海國資委批覆，而最近亦有消息指，中證監已受理上電發行A股購買資產之申請。

走勢上，上電股價3元水平乃一重要支持位，守得住，中線市況配合博上番3.8至4元阻力區唔係咩難事，不妨留意操作機會。