本周初筆者先提到港股超賣的修正，應不像上周的「半日貨仔」，豈料開口中，不過係衰多口，因為真係有「一日貨仔」。港股反彈一日後，昨日再次裂口低開低收，恒指最終跌479點，收報18,860點。

一月期指日市昨日收18,901點，成交維持在近期較高水平的15.9萬張，未平倉合約繼續過十萬張，淡友似乎未肯收兵。

消息面同樣瓜多過菜。首先，美國周四凌晨公布議息結果，若然有乜「意外」，咁港股就真係無眼睇，而且當日又撞正港股期指結算，再計計農曆新年前只得個多星期，單睇牌面，大戶挾落點都易過挾上。

策略上，周初尾市在19,300點樓下小注買入二月合約，昨日只能夠在萬九點水平止血。近期大市風高浪急，唔好話睇單日升定跌，就算要估即市係高開低收還是低開高收，難度都唔低，加上今晚美股又唔知會唔會有大龍鳳，港匯又唔知點收科，都係少做少錯，買個睡袋避一避「寒流」好過！