上周恒指萬九點失而復得，但人心都經已大受打擊，斬倉過後唔會咁快又衝番上車，外圍動盪，持有現金的亦唔急於買貨，再加上匯市散戶實在難以觸摸，觀望的人佔大多數，都係疊埋心水去辦年貨實際啲！

A股精要

截至去年底，內地金融機構人民幣房地產貸款餘額21萬億元，同比增長21%。其實，去年內房產業發展呆滯，房價亦唔見得好好，但相關的人民幣貸款餘額有增無減，其中一個原因，可能同唔少房企因應人民幣貶值問題，將美元債轉做人民幣債以規避匯率風險有關。今年內房產業的債務風險不容小覷，並直接威脅到金融業，所以上大人開宗明義要協助清理庫存。

講到金融業，上周內銀股有段震撼消息，就係話農業銀行（01288）披露北京分行票據返售業務發生重大風險事件，涉款高達39億元人民幣。據內媒報道，該案涉及兩名員工竊取銀行幾十億元人民幣票據，內銀的內部監管水平實在令人擔心！

金融監管漏洞太多

雖則話，對比市值，唔見幾十億唔會動搖到農行財務狀況，但事件反映內地金融市場，尤其是監管方面仲有好多需要改善的地方，唔搞好自身問題就對外開放，係一個好危險的行為！

展望本周，離農曆新年假期僅餘兩周，相信即使尚有餘震，本周內期指結算前後會完成，下周假期氣氛會明顯轉濃，市況窄幅波動。上周五市況反彈，「三桶油」功不可沒，但國際油價反彈能否持續，實難猜測，所以唔會建議博油股。

藍籌股中，聯想集團（00992）早在去年五月股價見頂回落，並在去年八月底展反彈浪，到去年十一月又再見頂，近日股價一度下試去年第三季的支持位，上周五收報6.59元，升3.6%。

照計人民幣貶值，有利聯想的產品銷售，而現時估值亦已回落至相對合理的水平。只是，智能手機市場競爭激烈，且未見到公司如何將製造業務進一步與互聯網結合以提升毛利率前，股價缺乏大升動力，只能在技術上極度超賣時睇位小注博反彈，暫先觀望6元關承接。