港匯波動，恒指昨日失守19,000點關，最低見過18,833點，成交更放大至922億元，果然呢次跌市進入戲肉了！勢估唔到今次跌浪來得咁快，由匯市波動，拖累股、樓跟跌，見到期指未平倉合約，上月中旬降到落五萬張，依家已高達十萬張，睇嚟淡友點都要嚟一次JETPOT，先至肯收手！

A股精要

人民幣匯率波動，最終燒到港匯身上。IMF重申繼續支持香港聯繫匯率制度，但聯繫匯率猶如雙刃劍。今年股、樓開局不順，為今之計係要忍，保留實力，若然要維持部分資金在魚缸內，宜盡量從防守性股份入手，勝在有得守，以盡量控制風險。

昨日提及的中移（00941），收市險守80元關，跌幅係三大電訊股中最細。呢啲市人心虛怯，股票幾有實力都好，跌起嚟都可以無譜，因為一時間市場悲觀情緒籠罩，個股沽壓遠大於購買力。不過，站在中長線，呢啲場面往往係良佳的入市機會。實力投資者，手持現金不用慌，耐心睇準時機，今年食粥食飯，可能就睇農曆新年前呢轉跌市有冇好好把握！

收益基礎夠穩陣

避重就輕，選股要重視業務性質及現金流表現，以策萬全。粵海投資（00270）逾半收入來自供水及電力業務，理論上收益基礎相對穩陣。本月以來，股價由11元水平反覆回落至9.5元水平，現時14日RSI處33。

若短線恒指下試18,500點水平支持，粵投進入超賣區，有機會喺8.5元樓下畀位大家上車，呢個位相等於一六年度預測市盈率12倍，息率3.6厘，中長線有得諗，可以密切留意表現。

中資金融股市盈率低，息率高，但筆者唔建議大家沾手，即使嚟緊可能又有瘋狂大減價，最好都係當睇唔到。皆因內地債市有點燶味，一旦爆煲仲慘過雷曼，屆時持有內銀股收息唔夠蝕價。冇貨在手，都係退一步海闊天空，又或者盡量分散投資，免得一個大浪埋嚟，冇得留低！