樓市出更：餐飲舖續租 逆市咬高35%

黎永滔同劉Sir講，文華MPM商場地下一個由本地茶餐廳翠華承租嘅舖位，最近以約60萬元續租三年，較舊租金約44萬元，高出咗逾三成半咁多，佢仲話其實早前曾經試過以約80萬元放租，但市場冇咩反應，所以繼續同翠華續租。

睇番資料，個舖位喺砵蘭街244號文華MPM商場地下，亦即喺區內地標商場朗豪坊對面，而翠華早於六年前已經開始租用該舖，當時月租約莫38萬元，舖位面積約2,300方呎。

另同區亞皆老街雙號一個原由連鎖鐘錶店承租的地舖，面積約500方呎，新近以逾20萬元續租，較舊租金亦略高。

寶湖車位傳收60票

車位方面，劉Sir八到，資深投資者蔡伯能持有嘅大埔寶湖花園停車場共120個私家車同貨車車位，最快日內拆售，昨日市傳該批車位嘅價單，私家車車位售價介乎109萬至189萬元，而貨車位售價介乎139萬至219萬元。

蔡伯能話，早前已投入約500萬至600萬元裝修車場，若車位未能沽清，餘下的車位會作長線收租。聽講該批車位已錄得約60張收票。

中環商廈租料跑贏

依家本港市場最吃香嘅物業，就係甲級商廈。世邦魏理仕簡儒德話，舊年甲級寫字樓嘅整體平均租金回升至全球金融危機前嘅水平，預計今年各主要分區嘅空置率，將會維持極低水平，預計中環商廈租金表現會好過其他地區，升幅有約5至10%，其他地區升幅約5%。

另中環環球大廈一個低層單位，以呎租約53.5元租出，月租約8.5萬元，較舊租大升33%。金鐘力寶中心1座中層單位以約3,230萬元沽出，呎價約2.2萬元。

該行戴文話，本地網上消費上升，注意到物流業相關租賃諮詢陸續增加，料倉庫空置率仍緊張，分層工廠大廈和工貿物業空置率維持在低水平，租金保持平穩。