恒指卒之跌破一三年低位，收市跌283點，下個目標相信是19,000點關口，但短期未必睇住人民幣，而是睇實港匯。人民幣昨回穩，離岸存款開徵存款準備金、人民幣中間價開得較高、李克強對外稱中國不靠貶值刺激出口，幾個因素加埋造就人民幣進一步回升。人行打擊炒家由一招變為兩招，會否留有第三招、第四招？現在各方睇住人行點樣玩法，可謂處於觀察期，當然亦會睇埋今日公布之GDP數字。

今年鐵路投資超過八千億元人民幣，基建股生意唔憂做。（資料圖片）

太陽日誌 2016/1/19

港股向來是提款機，港元都會步其後塵？7.8是強弱分水嶺，昨日在該水平徘徊無甚特別，但近期屢有評論指炒家遲早會向港元下手；法巴更發表報告，指若金管局被要求以外匯儲備購買人民幣，便可能動搖聯匯基礎。講笑咩？中國有三萬幾億美元外匯儲備，香港得三千幾億美元，搵香港幫手盞愈幫愈忙。

睇埋GDP再諗入市

不過，掉轉來講，當香港有難時，阿爺可能亦自身難保。今時不同往日，不能拿九七年直接比較，當年香港拆息挾高到300厘，想不到現時中國亦要借用挾高拆息呢一招。一切都是假設性問題，只能見步行步；生活仍是要繼續，對不？

昨日港股曾有一段「小V」，人民幣回穩、A股倒升、上月全國70大中城市樓價環比上升，都對信心有一定幫助。不過，收市仍要再沉淪，今日內地GDP公布大日子，就算想博反彈都睇埋先落注未遲。其實，GDP個數字並不重要，7或6.9又如何？那已是去年的歷史，今年如何才是投資者關心的地方。不過，最驚係淡友借住GDP公布，再唱衰中國經濟製造悲觀情緒。

再檢討三大指數表現，恒指14日RSI跌至21.6，傳統智慧話跌至20即嚴重超賣會有反彈；港股遲早有反彈，正如開完十舖細總會開舖大，問題是值博率不高。滬綜指縱反彈，但四日內有三日收市低於3,000點，國家隊放軟手腳，兩市成交金額已跌穿5,000億元人民幣，股民要博都玩深成指及創業板成分股。美股大約是三日當中有兩日跌、一日升，本周開始進入業績高峰期，美股是比較難測，因為有班資回朝，走勢上仍較中港股市樂觀。

昨日藍籌升幅榜頭兩位均是濠賭股，後四位則依次為中海油（00883）、中銀香港（02388）、新地（00016）及滙控（00005），各有不同跌因。但以中銀香港最為欷歔，該股創新高時是去年六月，昨日創52周新低，高低位之間差36%，同是因「人民幣清算行」呢個招牌決定成敗；大市氣氛雖差，但長線收息股又多一個選擇。另一隻收息股滙控雖受萬千中國大媽所追捧，惟股價低處未算低，逃過人民幣貶值卻逃不過股價下跌，大媽買金、買股、買外幣資產不斷受到挫折。

買債收息受歡迎

買樓又如何？上月全國70大中城市樓價環比上升，至少有一項（亦是最重要的一項）唔使咁悲觀。貨幣貶值與樓價的關係未有定論，但人民幣最新一期貶值是在上月入籃後，樓價反應要在往後的數據才能反映。錢用來買股票、買債券、買樓、或儲蓄、或用於消費，總有個傾向；現時相信大部分人都傾向於買美元資產，但肯定出路不多，所以債券是近期較受歡迎的投資產品，亦使收益率回落，惟相對買股票和買樓風險低得多。

上周五有30間公司進行回購，股市暴跌平貨多的是，問題是夠唔夠膽去執。昨日跌市有奇葩，除濠賭股之外，鐵路股亦大部分做好，只有中鐵建（01186）未能扭轉跌勢，原因是中國寫包單，今年鐵路投資仍將超過8,000億元人民幣，況且該板塊累積跌幅已相當深，睇番一五年PE，中鐵（00390）、中鐵建及中交建（01800）分別為7.3、6.5及5.5倍，有官方生意唔憂做，估值亦算庸中佼佼。

分析板塊之前跌因，主要是之前炒得過火，基建股一度炒至10倍PE過外，現在終於重返起步位。此外，中國將是連續三年鐵路投資超過8,000億元人民幣，但「鐵公基」總有盡時，鐵路總公司負債達天文數字，除非「走出去」有重大進展，惟日本亦同你鬥平鬥賤。基建股其實好睇唔好食，但既然現時已重返起步位，估值回至合理水平，個市若反彈亦要預埋佢，筆者會較睇好業務較分散及海外合同較多的中交建。