地產代理業僧多粥少，近月一、二手都唔係咁多成交，但係代理業界都未見有大幅裁員潮，兩大龍頭代理行美聯及中原，近期都已經分別流失約100人，其中後者更預計本月生意麻麻，營業額將會見紅，真係搵食艱難。

二手市淡靜，地產代理唯有靠新盤搵食。（資料圖片）

美聯布少明（中）稱，將集中在新盤供應較多的地區開分行。

淡市下地產代理動向

近排成個地產市道都幾淡靜，美聯住宅部行政總裁布少明同劉Sir講，公司近排主要透過自然流失，人手較高峰期減少近100人。不過佢預計今年分行數目同人手都變化不大，公司暫時都無裁員嘅行動或者計劃。

美聯擬新盤重鎮開舖

佢又話，公司會喺於新盤重鎮地區開設分行，好似係將軍澳同東涌咁，集團早排都已經租咗舖擴充；而主攻二手盤嘅地區，就會關閉部分分行，例如舊年執咗九龍塘一間分行。佢又同劉Sir講，今年港島同九龍區夾埋有4至5間分行會傾續租，會要求業主減租，如果唔啱價就會放棄續租，淨番嘅人手就會調配到特別係新盤較多嘅其他地區繼續工作。

講番美聯尋日新開幕嘅跑馬地分行，布少明就話個舖位月租約10萬元，較同區面積差唔多嘅舖位，高峰時期月租要16萬元，折讓差不多四成。

發展商代理以靜制動

其他行家人手流失速度都差唔多，中原亞太住宅部總裁陳永傑話，集團聖誕節到依家人手流失都有百幾人喇，仲預告今個月業績可能見紅；但係公司暫時都係採取「以靜制動」，暫時都冇計劃點樣大執人手同分行網絡，仲話近排反而多咗幾間分行。

利嘉閣總裁廖偉強就話，近一個月分行流失人手唔多，自然流失大概有幾十人，分行數目同分布都唔會有乜大變動，換舖部署主要係因應個別分行表現，佢承認，未來營業額主要都係來自新盤。

講真，呢排二手靜到不得了，發展商又咁落力推優惠賣樓，代理要搵到食，都要靠新盤食胡。

但係新盤銷售減慢，今年起大部分發展商都同代理一樣嚟一招「以靜制動」，今個月暫時只係得恒地（00012）負責銷售嘅長沙灣海柏匯有機會賣樓，不過始終都係單幢盤，全盤都只係得161個單位，已公布價單嘅單位仲要只係得50伙，相信對地產代理生意幫助有限。