極速炒股王專玩即日鮮

恒管Miko 個半月勁賺17倍

投資比賽向來少有女將勝出，就讀恒管工商管理學系的Miko就打破這個現象，以投資總額3,651萬元奪得季軍。

從未有投資經驗的Miko首次參加模擬比賽，一開始已經碰釘。「比賽第二日，買咗一隻細價股，諗住食佢一個價位，點知不停跌四、五個價位，當時決定唔放而且過夜，但第二日有合股消息，結果港股本金由100萬元得番70萬元，就知一定要即日鮮，唔可以留過夜。」

頻買賣賺複式回報

吸取教訓後，她參考過去勝出者的比賽心得，再舉一反三，創造個人炒股風格。「比賽前有搵過上屆的紀錄，研究點解可以將100萬元變成2,000萬元，發現唔可以單買一隻就賺咁多，結論係要密密做同all in，達到複式效果先有2,000萬元呢個位。」

Miko指，其策略是挑選當日十大成交額的股仔，再用半至一小時留意股價是否在一至兩個價位徘徊。結果，她在個半月不停炒賣五龍電動車（00729）、中國軟實力（00139）及前進控股集團（01499）等，令資產升值十七倍。

中大Jack 跌市主攻細價股

Jack首次參加中銀模擬投資比賽就擊敗眾參賽者勇奪冠軍寶座，全靠在20秒內炒賣細價股波幅，令200萬元資金增至3,966萬元，成為極速炒股王。「今次同升市玩法唔同，升市會搵啲市場當炒的股份，但跌市就要買細價股，短時間炒波幅套利。」

吼準大戶追捧愛股

尋找大戶追捧的愛股是他的主要策略，「開市頭一個鐘，會留意港股二十大成交量同升幅較大嘅股份，研究佢哋尋日及今日嘅數據。另外，見到大量資金追捧某股份，就會即刻撲入。」

他表示，「某啲股份嘅大戶會突然出現，咁我就每十至二十秒內買同放一隻股份。為保障自己利益，唔理升咗幾多都會放，所以幾分鐘內可炒好多次。」他指五龍電動車（00729）、中芯國際（00981）及中國創新支付（08083）等都是炒得較多的股份。

今次贏得模擬投資比賽的首三名，除獲現金獎外，更可以獲安排到中銀香港實習。Jack稱，「自己係讀風險管理，所以都希望可以到風險管理部門，或者市場部實習。」

恒管David 密食賺價差

David睇落熟口熟面，原來是上屆冠軍得主。今年雖然屈居第二，但總資產值增加至3,845萬元，較去年的2,083萬元多1,762萬元，證明他再次勝出比賽並非僥倖。

「今年比賽緊張過上年，因為上次首名同第二名的成績有一定距離，但今次頭三名都追得好緊，中期大家的資產相差大約3至4%。」面對強勁對手，David跟上年一樣，瞓身力攻細價股。「今次選股會買啲波幅大嘅股仔，見股價升跌一、兩個價位就密密食。」

他舉例，當時主力炒賣恒發洋參（00911）、恒騰網絡（00136）等。比賽的期間，原名馬斯葛的恒騰網絡獲騰訊（00700）及恒大（03333）入主，易名恒騰網絡，當時炒味甚濃。

技術分析定入貨價

他亦會研究個股的圖表及盤路擬定買入價，「先留意買賣盤，見到多人買就跟，而圖表方面就留意股價係咪跌到一至兩個月低位，如果係就買得過。」

雖然有晒全盤策略，David亦曾「一子錯，滿盤皆落索」。「記得當時買入中國置業投資（02937），估計可以升兩格，諗住揸耐少少，點知急插，惟有忍痛沽貨，結果蝕近200萬元。」