今年環球經濟負面因素不絕，敦豪國際（DHL）創辦人鍾普洋接受本報訪問時指：「物流與經濟息息相關，經濟唔掂物流都唔掂，無可能獨善其身。」各界普遍認為，今年做生意將更加困難。在環球市場經驗豐富的鍾普洋卻對逆境處之泰然，「香港人經歷過咁多次經濟衰退、升升降降，有咩大場面未見過！」

DHL創辦人鍾普洋表示，現時物流業正不斷進步。

冀培育出管理領袖

作為物流業老行尊，鍾普洋對本港物流業自有一番見解，「物流業唔太需要好高級嘅人才，最重要係有思維嘅人才。培養好領導思維嘅服務人才，對行業發展一定係最好。」所以鍾普洋與馮氏基金合作，希望培育出服務行業的管理領袖，將他多年來的經驗傳承下去。

他始終認為，雖然物流屬區域性業務，倚靠的是本地智慧，但要如DHL一樣成為跨國物流公司，管理層以中國人為主的話，很難做到。

本港物流用地不足

他指出，「要成功打入世界，最重要嘅係識得管理外國人。中國人做老闆有啲唔同，外國人以事論事，分分鐘會指住你個鼻嚟鬧，如果仲要顧面子的話，好難成為跨國公司。所以你睇，日本人為首嘅外國公司少之又少，因為佢哋同中國人好似。」他覺得，愈成功的人就愈要懂得謙虛。

對於本港物流業資源不足，鍾普洋道：「香港最唔夠就係物流中心，當年我同業界不斷爭取增加物流用地，但無辦法，我哋無錢畀嘛，唔夠地產商爭，就算到依家，都仍然好缺地方做物流。」

他指現時物流業不斷進步，「倉儲以前只會於公司入面，但現時已經係外判出去，所以好多物流公司就好似雨後春筍咁出現。」