踏入新一年，細價樓跌勢加劇，有心搵盤的話，300幾萬元上車盤愈來愈多選擇，即使住近港島豪宅區一樣有計，今期《置業故事》特別為單身貴族嚴選港島Mini Home，感受高人一等的生活。

港島豪宅區也有平價盤選擇，雖然單位超迷你，但勝在300幾萬可上車。

新界細價樓愈劈愈平，連大型指標屋苑嘉湖山莊兩房戶已失守三球關口，現時不愁沒有300餘萬元上車選擇，但對於過慣熱鬧繁華生活的年輕單身貴族，新界樓畢竟偏離市區，交通不太方便，若然有得揀，置業首選一定是市區樓。

業主軟化 有價講

其實，港島一些豪宅區如跑馬地、大坑及西半山，不乏平價上車盤選擇，雖然單位超迷你，部分更坐落豪宅區的「邊皮」位置，但勝在樓價親民，300幾萬元上車有得揀。

地產代理指，這類迷你戶放盤稀少，過往要大劈價賤賣難過登天，但近期股樓齊冧，市況持續低迷，至少業主心雄取態不再，置業者肯還價未必無得傾。

當然，在豪宅區買得300幾萬樓，不能奢望住豪華大宅，但能夠進駐豪宅區，體驗做上等人的感受，至啱追求Lifestyle的單身貴族。

鍾情星味十足的跑馬地區，首選萬俊花園的Mini Home，390萬元已有貨揀，是區內絕無僅有四球內上車盤。喜歡書卷味濃的西半山，可揀位處「邊皮」位置的觀海閣，368萬元可進駐一房居所。同樣Budget亦可揀大坑金樂居開放戶，鄰近潮人蒲點，隨時享受至In生活。