Fundman睇市：中國建築抵捧場

二仔底死跟住A股、美股的港股，午後見A股山泥傾瀉，早段升幅立即唔見一截，朝早最叻升過五舊，到收市得番223點進帳，收19,934點，睇見全日成交得773億元，多少已感受到死因，港股高位蟹貨一籮籮，浸浸落都見沽壓，幾時見底無得估，但一日唔見恐慌拋售，要有似樣的技術反彈，似乎並唔容易。

出口數據勿盡信

昨日中國海關公布上月出口意外回升2.3%，大幅優於倒退4至5%的市場預期，有部分分析認為是人仔貶值帶動出口回升，惟筆者認為可能性唔大，無疑去年「八一一」匯改是人民幣轉角市，經過十年的升值，進入調整周期，但要留意其他新興市場貨幣比人仔跌得更勁，相比下，一五年人仔只是僅次美元、港元，位居全球強勢貨幣之列，單單一、兩個月數據回升，恐怕唔足以令疲不能興的出口生意逆轉。

以波羅的海乾散貨指數作為環球貿易寒暑表可見，去年底情況只有惡化，沒有好轉，較合理的解釋，估計是「八一一」之後境內外人民匯價差距拉闊，更似是虛報貿易藉差額搵食的人為篤數情況死灰復燃，再唔信，睇睇出口數據曝光後相關股份及對中國股市刺激，可以話擲地無聲，大家都無謂諗多咗，以為係入市信號。

特首施政布告中，出現頻率最多的，竟然係去年股市早已炒到爛的「一帶一路」四個字，香港經濟如何可藉祖國因應投資高峰已過，把國內過剩基建產能出口的「一帶一路」故事獲益，在下真係參唔透。去年四、五月炒到癲晒的鐵路、航運、港口及基建技術企業，上面蟹貨之多，恐怕三、兩年內，最叻都係博吓反彈，無乜大升條件。

熊市加埋經濟唔好，估值平絕對唔足以支持真金白銀入市掃貨，最怕買低PE股，遇着業績因宏觀環境而走樣，隨時可以變成無前景的高PE股。要數夠低，非內銀莫屬，四大行市盈率都係得5倍樓下，表面睇好似好平，但假設一五年業績跌三成，一六年又跌三成，PE立即跳兩級變成10倍開外，仲抵唔抵自行評定。

尋日有外電報道，話去年內銀新增不良貸款倍升，全年達到5,000億人仔（為一四年2倍之譜），由中銀監大員早前在全國銀行業監督管理工作會議上透露，截至去年底商業銀行不良貸款餘額，經已連升十七季，不良貸款率亦連升十季。

內銀股便宜莫貪

全球經濟低迷已成為常態，加上匯率偏高對中國出口經濟帶來的雙重打擊，高增長模式無疑已走到盡頭，企業經營困難、信貸質素轉差的周期，絕非一、兩年之間可以逆轉，一日經濟未見到起色前，內銀股估值表徵再吸引都無用，業績跌得快過股價的話，PE只會愈來愈高。

講番每年施政報告，建築股幾乎係例炒。近年有不少建築股上市，而且炒味十足，看中的不是業務前景，而是「細細粒容易食」以及賣殼憧憬。當然，亦有市值高兼業務規模大者，如中國建築（03311）近月走勢就有翻生迹象，股價由八月底的9元低位起步，累積升達五成。集團去年新簽合同上升16%，今年目標再按年升15%，預計不低於780億元；在現時中港百業皆頹的情況下，此類穩健增長的股份已屬難得，而其一五年預測市盈率不過10.8倍，有一定吸引力。

另一類則是有潛質的賣殼股，除了俊和（00711）以及泰昇（00687）市值達20億元之外，普遍只得幾億元市值。此外，大股東持股量則相當高，泰昇、雅駿（01462）、三和建築（03822）均持股七成以上，其餘亦普遍在五成以上。其中三和大股東持股71%，一家基金公司持股近一成，街貨不足兩成，而集團過往有曾經上市及賣殼紀錄，一四年重新上市亦不免惹來投資者憧憬。不過，近期港交所（00388）對後門上市似乎有所收緊，賣殼活動可能有所收斂。