港股威得半日，昨日A股尾市愈跌愈急，港股升幅亦極速收窄，由早市最多升523點，收市升得223點，報19,934點，主板成交僅773億元，令昨早市像短線技術反彈，多於大市轉勢。

昨期指以20,075點開出，試了19,951點支持，藉人民幣挾息恐慌稍為平息，早段曾高見20,229點，惟午後A股掉頭，港股反彈之勢走樣，三點後，博反彈打靶盤湧現，期指最低落到19,818點，到現貨收市前後，才收復部分失地，日市以20,059點收，高水124點。

今時唔同往日，炒港股仲要考量A股玩家後知後覺因素，像港股今浪一早穿九月低位，滬綜指到昨日才穿三千關口，早兩日人行以挾息痛擊老外，鳴金收兵之際，內地居民還在搶換港元、美元，滯後反應下，昨日港股午後會否反應過敏？不妨睇埋今日才作定奪，企得住20,000點樓上的期指，有機會再彈高些少，見20,400至20,620點之間。