聖誕、新年過後，樓市例牌進入傳統淡季，二手市況難免捱打，業主心慌想盡早甩貨，叫價自然要愈劈愈深，即使叫價較硬淨的海景盤也出現減價貨。「平平哋」可放眼青山公路的臨海屋苑，入場費350萬元有交易，歎海景一樣有計。

浪翠園規模龐大，有不同期數及戶型可供選擇。

青山公路是新界西傳統豪宅集中地，擁有蜿蜒曲折的海岸線，背山面海的居住環境，絕對不比市區海景居所遜色，更重要是樓價平一大截，是Budget有限的愛海人士不錯置業選擇。

豪景可借九成按揭

踏入二○一六年，二手劈價潮擴散，青山公路一帶的海景盤同樣有筍盤可揀，有心入市的買家若肯大膽還價，隨時執到平貨，收大禮迎新一年，日日有海景相伴並非夢想。

區內代理指，雖然這帶業主認為樓價偏低，多數不願減價，惟市況持續低迷下，不乏業主面對現實減價，兩房及三房戶皆現平價海景盤，上車、換樓一樣有得諗。

上車首選坐落青龍頭段的豪景花園，兩房戶近期減至350萬元有交易，日日對住無敵海景之餘，還可借足九成按揭，做業主無難度。

換樓選擇更加多元化，級數較高可放眼深井段的浪翠園一期，是九十年代新界西樓王屋苑，設有會所，隨時隨地享受悠閒時光，現時海景入門盤減至480萬元，較去年高位價回落12%。

想住得更鬆動，最抵可揀青山灣段的海景花園，最近有兩房海景樓王戶減價求甩貨，連車位叫價500萬元，減幅約一成。