二○一六年真係開局不利，內地股市四日之內第二次燭發熔斷，昨日僅交易十五分鐘，提早在九點五十九分收市，滬綜指停市前收報3,125點，跌236點，深成指跌964點，收報10,760點，認真誇張。

在股市大幅調整下，藥業股是值得留意趁低收集的板塊之一。（資料圖片）

內地股市下挫，港股當然無運行，恒指低開208點後，跌幅持續擴大，最多跌656點，低見20,323點，跌穿去年九月低位，最後以接近全日低位20,333點收市，跌647點，跌幅3.09%。國企指跌383點，收報8,753點，跌幅4.2%，全日成交金額增加至1,071億元。

羊群效應加劇跌勢

中國證監會經過兩日熔斷之後，昨日召開緊急會議，但係阿莊覺得今次推行熔斷機制，雖然外國亦有類似制度，但外國市場的投資者相對內地股民成熟，加上內地散戶比例較高，在缺乏投資教育，股民只懂跟風的羊群效應下，驚死蝕底，成日出現人踩人事件，無論升市同跌市都一樣。

近日內地頭頭碰着黑，股市失控下跌，人民幣跌勢未止，持續貶值，家陣真係不知如何收科。

A股尋日熔斷之後，港股又再次成為提款機，好多股份急挫，中資股跌幅更大，自從港股A股化之後，好多大價股波幅有時仲勁過股仔。炒股仔見勢色不對路，都即刻走人，但持有中資股，諗住佢有實質業務支持，唔怕持有，點知愈跌愈深，所以阿莊覺得無論大價股又好，細價股又好，都要嚴守止蝕，否則只會輸鑊甘。

目前，恒指9RSI已跌至17，技術上應該有反彈，但係環球金融市場波動，相信港股即使有得彈，幅度都有限，假如恒指失守20,000點呢個心理大關，到時的跌勢可能會更急，所以現階段仍需審慎為上。尋日大市急挫之下，主板上升股份寥寥可數，只有85隻，跌的多達1,496隻，認真一面倒，所以在大市跌勢未喘定的情況下，入市千祈不要心急。

國藥控股（01099）早前公布其最終股東中國醫藥集團總公司，目前正在籌劃一項資產重組計劃，擬向系內公司出售若干化藥工業類資產，同時向系內公司購若干醫藥商業類資產，以發行新股方式支付代價，若然落實公布，相信有機會成為刺激股價上升的催化劑。

國藥首三季純利達28.4億元人民幣，按年升32%，由於集團有力拓展更多增值服務，帶動公司盈利繼續保持可觀增長，前景可看高一線，近日隨大市下跌，並跌穿29元關口，由於業務穩健，故不妨列入觀察名單，趁股價下跌吸納。