A股前日在國家隊救市的傳聞帶動下彈番2%，點知昨日開市半小時滬深300先後觸發熔斷機制5%及7%觸發點，結果全日休市。滬綜指跌236點，收報3,125點，創近3個月低位。

A股精要

理論上，熔斷機制的設立原意係好，但跌幅5%及7%的熔斷觸發點一來未有確切針對A股的波動性，二來兩個觸發點太接近，好容易就令A股停跌，咁落去股市無法正常運作，等於趕客！

昨午傳來中證監召開緊急會議商討改良方案，希望班官大人快快趣補鑊，咪再累街坊！

元月以來A股急跌，原因與市場憂慮人民幣走弱及大批限售股於本周解禁有關。為此，中證監公布了減持新規，規定公司大股東若要集中競價交易減持股份，應在首次賣出的十五個交易日前預先披露。

而按照新規定，大股東在三個月內通過競價交易減持的股份總數，不得超過公司股份總數的1%，相信短期內有效阻嚇公司股東減持，紓緩股市沽壓。

港股淪為提款機

A股停市，繼續交易的港股便淪為提款機，國指跌近半成，與恒指同創兩年半低位。恒指呢浪要考驗兩萬點關的機會甚大，總之買貨唔使心急。

昨日能夠逆市做好的股份，埋單約百隻，其中一隻係連升三日的卡姆丹克（00712），昨日股價一度高見0.86元，收報0.82元，升5%，成交2,396萬元。

上月底曾傳出光伏產業「十三五」規劃徵求意見稿下發，具體係提出到二○年底，太陽能發電裝機容量達到1.6億千瓦，年發電量達到1,700千瓦，年度總投資額約2,000億元人民幣。

不過，遠水難救近火，去年第三季卡姆丹克仲蝕緊錢，照計可以強勢連日逆市升而成交增，似係醞釀消息，但係咩東東，筆者都冇水晶球，不妨等着瞧！