核心區零售舖租大幅回落，各類零售品牌亦趁機進駐。劉Sir知道，由本地化妝品店莎莎（00178）承租嘅旺角西洋菜南街百寶利商業中心地下部分舖位連一樓，將會喺下月中遷出，但同時進駐同一街道、由舖王波叔持有嘅銀城廣場樓上舖，而原本承租嘅百寶利商業中心舖位，以及樓上部分樓層，聽聞已獲國際快速時裝品牌以約250萬元洽租，估計會用嚟做旗艦店。

核心區舖租回落，造就機會予需要大樓面的品牌進駐。圖為旺角西洋菜南街。（資料圖片）

莎莎於旺角百寶利商業中心的分店快遷出。

旺角核心街道舖位市況

莎莎發言人同劉Sir講，其實百寶利商業中心業主話因為想重整租戶組合，所以就不續租，嗰個舖位將會喺下月中遷出，由於要滿足客人需求，佢哋喺同一街道銀城廣場已經承租咗一個樓上舖，仲喺上個月開業。

睇番土地註冊處資料，百寶利商業中心舖位地下及一樓由莎莎以125萬元承租，租約即將於下月底到期。

劉Sir仲八到，莎莎原本承租嘅地舖及一樓，連同二、三樓舖位，獲國際時裝品牌以約250萬元洽租。

據了解，舖位面積約莫2萬方呎，應該用嚟做旗艦店，聽講依個新租戶喺幾年前已經想進駐旺角最旺街道，但當時畀另一間公司截糊搶租，所以今次都算係得償所願啦。

H&M進駐同區家樂坊

其實，近年核心區舖位租金回落不少，造就咗不少機會畀需要大樓面的行業進駐旺角，好似同區登打士街潮流商場家樂坊，亦已經有約5.5萬方呎樓面，租予國際快速時裝品牌H&M。

另外，市場消息話，原本由連鎖快餐店以約45萬元承租的油麻地彌敦道雙號4個舖位，其中2個舖以逾20萬元租予東南亞餐廳，餘下兩個舖位則分別以5.5萬及7.6萬元放租。

灣仔道國泰88商場三樓一個舖位，面積約60方呎，以約28萬元售出，呎價僅約4,666元，較逾十年前購入價低46%。資料顯示，中環歌賦街29及31號地舖，分別以4,400萬及2,600萬元沽出。

荃灣工廈車位今加推

中原商舖部黃東雄同劉Sir講，投資者林子峰旗下荃灣橫龍街興盛工業大廈車位項目尋日拆售，首批20個私家車及貨車車位即日沽清，其中，私家車車位成交價140萬至190萬元，而貨車車位則200萬至220萬元。

而喺今日再加推20個車位，料全個項目共51個車位市值約1億元，而林氏喺早前只係以4,680萬元向恒地購入。