今年樓市突然轉壞，搞到一眾投資者對明年核心區舖市都唔係太睇好。有投資者同劉Sir話，預計明年舖市甚至會跌落谷底，全年舖價最多跌15%，之但係有危就有機，若回報率去番4厘時就會把握時機撈底。另有投資者估計，商廈市場表現可以一枝獨秀，明年無論係超甲廈、甲廈同乙廈呎價料最高可以升15%。

今年核心區舖市慘淡，而投資者亦一致看淡明年舖市。圖為尖沙咀加連威老道。（資料圖片）

廖偉麟表示，明年會積極入市。（資料圖片）

前排大手掃入上環全幢商廈嘅惠集團副主席廖偉麟預計，明年工商舖投資市道將由商廈市場一枝獨秀，事關寫字樓空置率依然企喺低水平，加上今年本港集資額依然仲係全球前列位置，證明唔同類型公司都嚟香港投資，估計明年無論超甲廈、甲廈同乙廈呎價會升10至15%，所以前排已經用約3.57億元買入上環乙廈永樂街148號南和行大廈共8層半樓面。

民生區升幅可達8%

佢又話，明年都會積極入市，已觀察到部分舖位嘅回報率，因為售價回落而升番去3.5厘，預計明年新年之後舖市會跌到谷底，到時回報率若果升番去4厘就會入市，料明年全年舖價跌5至8%，依家留意核心區好似銅鑼灣、旺角及尖沙咀等二線街道舖位，另外都睇好民生區舖位，因為呢類地區都唔受市況影響，相信民生區舖價仲有5至8%升幅。

而今年已投資超過20億元喺工商舖車位市場嘅資深投資者林子峰話，估計明年入市投資額會相若，但未來投資市道走勢好難料，農曆新年前仍會採取觀望態度，依家留意緊一、二線區嘅零售舖位，隨時會入市用嚟做旗下零食店嘅自用舖。另外，活化工廈政策雖然喺明年三月結束，但只要物業係優質同呎價低水，都依然會入市。

環球大廈呎嗌100元

資深投資者蔡伯能就話，會以平常心去應對明年投資市場，他自己就無看好某一類物業，但只要售價低水便會入市，而依家持有嘅中環環球大廈6樓多個單位正放租，意向呎價達100元，而明年一定會再提價放租。

而今年中曾拆售鑽石山嘉就工業大廈部分樓層嘅投資者呂承健都話，明年部分呎價低水或位處轉型地區嘅工廈仍有一定吸引力，而舖位售價就仍然處於調整期，估計幅度將會在10%以內。

另外，位於火炭坳背灣街一幢工廈地下的「iPLANET」，昨日拆售約93個工作室。據聞，開售前已獲足夠登記，截至昨晚約八時，市場售出約一半單位。