港鐵（00066）今年開快車推地協助政府「跑數」，尋日截標嘅將軍澳日出康城第九期一共收到6份標書文件，主要由大型發展商競逐。不過有傳聞話今次有個別發展商只係遞交感謝信，而並非入標。另外，原來呢個項目已經係今年第5個已批或截標嘅鐵路項目，全年加埋有成8,360伙住宅供應，比舊年多出24.8%，相信係歷年最多鐵路項目單位供應嘅一年。

將軍澳日出康城第九期項目（箭嘴示）共收到6份標書文件，反應不錯。（資料圖片）

信置夥拍萬科置業（香港）等。圖為信置代表到場入標。

長實地產代表遞交項目標書。

今年截標及批出的鐵路項目住宅量

港鐵公布，日出康城第九期喺尋日一共收到6份標書文件，公司會詳細考慮收到嘅標書，喺稍後公布結果。

新地信置長實競逐

劉Sir尋日都喺截標現場，見到唔少大型發展商入標投地，好似長實地產（01113）、新地（00016）同會德豐地產呢啲區內地主都有入標，另恒地（00012）都話獨資競投。

不過市場有傳聞話今次個別發展商只係入感謝信，並非標書。

今次亦有大發展商夥拍其他中小型財團入標，好似新世界（00017）就同遠展（00035）合資入標。

至於信置（00083）連同萬科置業（香港）、嘉華（00173）同永泰（00369）入標，即係今次雖然只係得6份標書文件，但參與財團就有10個咁多。

劉Sir知道，項目嘅補地價金額大約28.52億元，即係每方呎約莫2,545元，呎價比起第八期低超過一成。

對於項目每方呎補價金額較第八期低，會德豐地產何偉錦尋日遞交標書嗰時就話，都係反映番項目嘅景觀問題，認為地價合理，仲話地盤位置唔錯，集團附近亦有發展項目，今次獨資入標競投。

反應不錯 料快揭盅

劉Sir知道，日出康城第九期提供唔超過1,780個單位，而項目都幾有機會喺呢兩日批出。

其實，加埋今年批出嘅日出康城第六至八期、同埋天水圍輕鐵天榮站上蓋項目，港鐵今年就批出咗約8,360伙住宅單位供應，比舊年批出3個項目加埋6,700伙，多出約莫24.8%，劉Sir大膽講句今年係歷來最多鐵路供應嘅一年。

老友美聯測量師行林子彬就咁睇，佢話項目有6份標書反應唔錯，雖然美國落實加息，政府又積極推地，但鐵路項目依然需求殷切，所以吸引到大型發展商入標。