息魔殺到，近年上車客熱捧的細價樓終於見頂滑落，特別是平價盤集中地的屯門，樓價升得急自然跌得更快，現時一些規模較大的屯門居屋及私人屋苑已湧現「三球」內放盤，絕對是無殼蝸牛的喜訊。

豐景園主攻兩房單位，多數屬眼鏡房設計。

屯門位置偏遠，但近年上車客爭相搶貨下，樓價愈來愈「離地」，今年旺市時更有西鐵屯門站上蓋新進屋苑兩房戶衝上「六球」，認真誇張。年輕一族即使做一世樓奴也未必買得起，心情難免「灰爆」。

大型屋苑有得揀

不過，隨着美國宣布加息，二手樓市難免受到衝擊，新界細價盤更掀起劈價潮，近年樓價癲升的屯門樓價難逃插水命運，現時「三球」內上車已不再是夢想。

據主攻新界西北細價盤市場的祥益地產數據，截至十二月底，屯門區300萬元或以內放盤量持續激增，現時約有逾200個，較八月低位升逾倍，其中居屋盤源更激增約1.5倍至超過100個；私樓則由67個增加76%至118個，平價上車選擇可說是不少。

要300萬元內在屯門上車，當然不能奢望住西鐵站上蓋新樓，但具規模的屋苑式住宅絕對有得揀。最平不妨向區內居屋埋手，入門首選碼頭區的兆禧苑兩房戶，自由市場270萬元起可上車；愛靜一族可揀私人參建居屋景峰花園，自由市場價290萬元起可做兩房戶業主。

私人屋苑方面則首推豐景園，附近社區配套設施齊全，日常生活便利，現時兩房戶290萬元起有貨揀。