美股跌港股唔願跟，隔晚道指反彈，港股一樣唔肯跟升，節日氣氛籠罩下，大戶陸續收爐，昨日主板成交縮至482億元，恒指尾市拗腰回升38點，收21,830點，即月期指日市收21,817點，低水13點，成交唔到九萬張。

昨早市期指在21,841點遇到阻力，未能挑戰周一的兩個即市高位，沽盤相對積極下，期指早市最低落到21,704點，30分鐘圖上，觸及保力加通道底已見一定支持，整個下晝大市緩慢地收復上午失地，最高見21,826點，基本上，礙於現貨成交疲弱，睇好睇淡的期指客，也沒有決心挑戰21,488至22,009點的短線支持及阻力位。

可以預期，在成交愈玩愈縮下，未來幾日交易的意義唔大，中線而言，恒指過去幾日一直壓在20日線以下運行，假如能夠在年結前出現突破，即使是低成交下有限度的攀升，重返20日線樓上，對明年初開局，走勢上亦有心理上幫助，至少可以扭轉恒指在21,010點起步的短期反彈經已結束的悲觀想法。