講到三房戶樓價最親民的藍籌大型屋苑，不得不提嘉湖山莊。屋苑雖然坐落位置偏遠的天水圍，但自西鐵通車後，住戶出入市區時間大大縮短，只需搭幾個站輕鐵即達西鐵天水圍站口，四圍去時間有得預，不怕大塞車。

屋苑現有二十個三房筍盤放售。

置富嘉湖商場各式食肆雲集。

嘉湖山莊鄰近的濕地公園，是一家大細假日好去處。

嘉湖山莊另一煞食賣點是規模夠大，各期圍繞天水圍市中心而建，有如置身小社區，附近有綠化帶、濕地公園、商場、學校及會所等，配套一應俱全，居住環境不比市區藍籌屋苑遜色。

廳房俱大 啱家庭客

中原馬斯力表示，嘉湖山莊三房盤向來充裕，尤其樓市轉勢，加上息魔殺埋身，屋苑樓價不斷下滑，近月400萬內的放盤急增至20個。現時入門盤為1期樂湖居9座低層戶，屬鎖匙盤，單位實用面積551方呎，望內園景，十月仍企硬420萬元，現減至370萬放售，較今年高位冧價約一成，早前旺市時只夠買質素最差的兩房戶。

這類單位屬屋苑入門三房戶，只有一個浴室，勝在廳大房大，迎合對居住空間有要求的家庭，惟廳堂呈鑽石形，擺位考功夫。

馬氏續說，嘉湖山莊現時大多放盤叫價硬淨，令上月買賣只得25宗，本月市況持續淡靜，暫只得9宗，業主普遍要劈價逾10%才有承接，當中5期麗湖居4座一個高層三房戶，更以360萬元易手，成交價創今年新低。