荃灣中心是荃灣具名氣的上車屋苑，但其實一樣有三房單位供應，最近更冧價至「四球」有盤揀，是區內換樓入門之選。坐落荃景圍山腰的荃灣中心，雖然樓齡不算年輕，最高達三十五年，內籠難免殘舊，但勝在近山而建，遠離荃灣鬧市煩囂，居住環境寧靜。

愉景新城商場購物方便。

荃灣中心單位間隔見使好用。

屋苑規模龐大，19座物業倚山而建，提供逾4,500伙，設有商場，亦離消費熱點愉景新城商場不遠，購物、消費方便快捷。

叫價400萬有得傾

近年細價盤樓價升到癲，上車客熱捧的荃灣中心兩房戶，今年旺市時曾直衝400萬元，三房更見450萬元，惟隨着樓市轉勢，上月驚現冧價成交，有兩房戶以303.8萬元、一四年頭價易手，三房戶難免有回落壓力。

中原林經略表示，現時屋苑三房入門盤首選南京樓低層戶，實用面積425方呎，連生約放售，九月單位曾叫440萬元，及後業主擴大議價空間，新近400萬元有得傾，是屋苑唯一一個重返「四球」的三房放盤。

這類單位採三房一浴室設計，最大特點是間隔四正，全屋無窗台，而且走廊位少，內籠見使。