世事如棋，結局往往出人意表。幾個月前樓市旺到爆，無「四球」基本上唔使指望上車，但隨着樓市轉勢，加上息魔殺到，樓價見頂冧不停，上車、換樓的分界線明顯重新定義，現在同樣Budget其實夠買新界指標屋苑三房居所，「平平哋」換樓有得揀。

荃灣中心規模龐大，提供逾四千五百伙。

臨近年尾，二手樓市陷冰封狀態，部分業主驚青見勢色不對，不惜愈劈愈深吸引買家，尤其是近年升得最癲的上車盤，更不斷急速下滑，一些新界細價盤成交價已回歸「三球」多少少，旺市時「四球」上車的定義可謂改寫。

大型屋苑配套齊全

細價盤失守，三房戶自然難以獨善其身，對望樓興嘆多時的換樓客來說，最期待的畫面可說是終於出現。其實，只要識得揀，旺市時的「兩房價」如今已夠買個三房居所，而且不乏配套齊全的新界大型屋苑，「四球」或以內放盤絕對有選擇。

若然Budget有限，首選天水圍嘉湖山莊三房戶，房大廳大，住得舒適，現時入門盤減至370萬元，較今年高位插水約一成。

「四球」預算可揀荃灣中心及粉嶺碧湖花園，前者內籠好用，入門盤最近重返400萬元，較今年同類高位冧價回落8%，是區內三房入門之選。至於碧湖花園雖然位置偏遠，但勝在設有會所及商場，足不出戶享受悠閒生活。