近年有唔少商場劏舖攞出嚟賣,售價細都幾受街坊投資者歡迎。但每個劏場項目至少百幾個舖位,搵租客都唔係咁易,雖然部分業主願以低廉嘅租金吸客,開業率依然奇低。開業逾一年嘅荃灣地皇廣場,月租入場費低至3,200元,但依家只有唔夠三成舖位開業,部分更因商戶開舖情況未如理想,被管業處指違反副公契要求改善,有街坊同劉Sir講,相信有區內居民唔知道有呢個商場存在。

荃灣地皇廣場各層都有舖位放租,月租約三千二百元起。

地皇廣場內現時不足三成舖位開業。

荃灣地皇廣場舖位放租個案

商戶心聲

多年前政府推出辣招稅,但就未有對商用物業落藥,所以呢類物業就吸引到啲投資者,好似喺一二年底由資深投資者尹柏權拆售嘅荃灣大河道地皇廣場,提供共逾230個商場舖位,當時每個售價約246萬至738萬元,大業主仲提供首兩年5厘租金回報。

持續吉舖 或違公契

呢個項目一如市場其他劏舖一樣,買入舖位嘅業主要以低廉租金吸客,月租入場費僅約3,200元,但入伙逾一年,商場一至三樓各層仍遍布吉舖。據市場講,依家各層都有交吉舖放租,每個實用面積約30至50方呎,月租只約3,200至5,000元,呎租96至125元,其中一樓有個單號舖位,實用面積約40方呎,月租約5,000元。由於個商場舖位開業率奇低,商場管業處喺月前發出公告話,商戶開舖率未如理想,若果狀況持續,將違反副公契條款。

理想城市企業估值部主管張聖典話,雖然開舖率低或者有機會違反公契條款,但商場大業主對於未有開舖嘅個別業主或租戶,並無任何實際方法可以懲罸或限制,根本吹佢哋唔脹,而且大廈公契作用僅僅係定下規矩,告知業主需要遵守同唔容許作出嘅事項,對租戶未能起作用。

近傍晚人流仍疏落

睇番個場,1至3樓共有逾230個舖位,劉Sir早排下午四時幾去過商場,發現1同2樓都有約20個商戶開業,而3樓就有約23名商戶開業,商戶有蛋糕店、首飾、化妝品店、美甲店及手機配件等,若果以咁樣計算,開舖率唔夠30%。

聽有租戶講,商場人流極少,加上租金只係數千元,有租戶同業主寧願選擇唔開舖,避免其他開支。

睇番當日下午五時,地下商場入口,十分鐘只得12人行入商場,平均每分鐘約1.2人,而距離商場門口唔夠十米嘅馬路,每次綠燈過馬路,亦至少有50至60人。