美股上周五散晒，今早港股當然係冇運行，恒指低開四百點，國指更一度低見9,112點，再加上中遠系復牌玩笨豬跳，復星系復牌亦現逃亡潮，缸邊友真係睇到心到實！

A股精要

之不過，戲劇性的發展在午後出現，滬綜指收復失地之餘，更倒升2.5%收場，一定程度穩定了人心。恒指午後跌幅收窄，收報21,309點，跌154點，成交774億元。好多老友記打嚟問復星孖寶撈唔撈得，又或者溝唔溝得。

筆者認為，短期公司繼續受是非困擾，若未有持貨，無謂偏向虎山行；若經已持貨，昨日見唔少投資者都執行風控措施減持或沽之哉，即使係信心堅定想繼續持貨，見昨日股價跌幅唔大唔細，呢啲位都係睇定啲咪心急加注。

至於中遠系與中海系的資產重組，中遠系股份復牌後表現不濟，交易中孰得孰失高下立見。簡單講重組後中國遠洋（01919）及中遠太平洋（01199）分別主力做集裝箱業務及碼頭業務，現估值仍有下跌空間；中海發展（01138）出售了不景氣的散貨運輸業務，主力做前景較佳的油氣運輸，重估動力將支持股價表現。

TCL多媒體（01070）宣布配股予樂視，集資22.6億元，昨日復牌。由於停牌前股價已急升，昨日遇上跌市，股價回吐3%。基本上，一個係製銷電視機專家，一個正積極做互聯網電視內容，兩者合作可起一加一大於二的效益，TCL多媒體有望打破純電視機生產商的局限，估值有上調空間。

協同效益待發揮

講到樂視入股TCL多媒體，原來受消息刺激而做好的，反而係酷派（02369），股價升兩成，收報1.56元，成交8,139萬元。事緣早前樂視已入股酷派，持股量近18%，如今集齊互聯網電視內容、電視機及手機製銷於一合作體，三者日後主攻互聯網商機協同效益值得期待，難怪酷派股價亦借勢大幅反彈。

走勢上，酷派股價較大阻力位在1.7至1.8元水平，相信是浪反彈至接近該水平會有一定阻力，回吐主要支持在1.4元。